CO TYDZIYŃ PO NASZYMU: Odmaryja na kurble to ci je niemożebnebyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Zaś tyn tydziyń podarziło sie w Cieszynie cosi nowego spozdrzić, a uż żech rozmyśloł, że pudym s torbami jak cosi nowego nie napiszym. To nowe, to je plac na biuro w kierym idzie łod tego tydnia przigłosić swoji auto, coby bez wiynkszej łostudy mógło po naszych cestach gzuć we wszecki stróny. Kapke to bydóm mieć tustelocy łod rynki, ale isto nie szło nónś nic lepszego w cyntrumie miasta. Coby jednakowóż nie było skyrs tego wielkigo krawalu, to kierysi wyszpekulyrowoł coby puścić tam do nich ekstra żółty autobus. Kiery nim mo jeździć, to do dzisia nie wiadómo, bo przeca jak gdo chce przigłosić swoji nowo-stare aucisko, to poradzi nim sóm tam do nich przijechać. To by było jedno, co uż funguje, ale nie wiadómo gdo s tego bydzie mioł nejwiyncyj uciechy. Za to isto moc uciechy bydóm miały wszecki urzyndniki, kiere dostały nowe wieca, przidajne do urzyndowanio. Je tam tych izbów tak moc, że ciynżko je wszecki porachować, a ku tymu eszcze rozmajte zieleźne odmaryje na papióry, kiere ni majóm dwiyrzi i trzeja ich otwiyrać szpacyjalnymi kurblami. Je to taki patynt, kiery bydzie możne aji przidajny do gimnastykowanio i dziynka tymu żodnymu urzyndnikowi sie tam rynce nie zastojóm. Skyrs tego każdy jejich urzyndnik, dziynnie po robocie bydzie dobrze rozruszany i nie bydzie musioł iś wyginać sie, na ty gimnastyczne gesztele, kiere uż fungujóm w Cieszynie na każdym osiedlu. Tyn kiery przyszeł na to, coby taki odmaryje tam wrazić, isto ani sóm sie nie kapnył, jakóm dobroć podarziło sie mu sie tym urzyndnikóm fundnóć. Mini słownik: podarziło sie - udało się, spozdrzić - zobaczyć, pudym - pójdę, przigłosić - zarejestrować, cesta - droga, gzuć - gnać, kapke - trochę, nónś - znaleźć, skyrs - z powodu, krawal - awantura, wyszpekulyrowoł - wydumał, poradzi - potrafi, funguje - funkcjonuje, przidajne - potrzebne, odmaryje - szafy, kurbla - korba, gesztele - urządzenia, wrazić - włożyć, nie kapnył - nie zorientował, fundnóć - ofiarować. Tóż miyjcie sie wszedcy dobrze i wiesiołego popióntku.
|
reklama
|
Dodaj komentarz