CO TYDZIYŃ PO NASZYMU: Wszecko idzie zrobić, jak sie mo moc chynci

Fórt je cosi pisać, bo tyn Covid nie dowo nóm spocznóć ani na chwikiczkem i skyrs tego, ludzie też ze sebom ni mogóm prziś do porzóndku. Czy kiejsi gdo widzioł, coby tyjater był ganc prózny, a przed nim na schódkach gdosi śpiywoł a drugi groł na insztrumyntach ? Mało tego, kierzi to śpiywani posłóchali siedzieli na trowie i jakosi im to nie zawadzało, że ni mieli nad sebóm żodnego dachu. Hańdownij, eszcze w Grecyji, też były taki tyjatery bez dachów i wyglóndo na to, że podarziło sie nóm curiknóć naszóm historyje aże do starożytności. Yno czakać jak za chwilem insi bydóm to przedrzynźniać i prugować w inszych miejscach cosi zwekslować. Uż widzym jak tustelocy bydóm przinoszać rozmajte żbery i wasztroki przed basyn i w nich bydóm se moczyć swoji zadki, zamias wlyś do postrzodka. Możne, że aji przed sóndym znóndóm sie tacy, co bydóm poradzić bez syndzigo zacznóć korać ludzi i do sóndu nie trzeja bydzie wubec wlazować. To przeca też dopadło wszeckich szkolników, bo jak im pozawiyrali szkoły to musieli szkartować w ksiónżkach we swojich chałupach. Tak rozmyślóm co by eszcze szło robić na polu jak insze urzyndy nóm pozawiyrajóm. Daleko nie trzeja chledać, bo do dochtora też nie idzie wlyź i aże dziw biere, że żodne znachory eszcze nie rospostrzili swojich kszeftów przed jejich dwiyrzami i nie lyczóm ludzi. Dłógszy czas mieli też ostude s otwiyranim swojich kszeftów wszecki golibrody i też dziw biere, że żodyn przed jejich dwiyrzami nie zacznył strzigać ludzi. Gospodzkim sie jednakowóż jakosi podarziło odewrzić swoji kszefty i żodyn nie musioł przed jejich dwiyrzami zacznóć warzić we swojich garcach i inszych pónclokach.

Mini słownik:

fórt - ciągle, skyrs - z powodu, prziś do porzóndku - pozytywnie załatwić, kiejsi - kiedyś, tyjater - teatr, ganc - całkiem, hańdownij - bardzo dawno, podarziło - udało się, curiknoć - cofnąć, zwekslować - zamienić, żbery - pojemniki na wodę, wasztroki - koryta na pranie, wlyś - wejść, poradzić - potrafić, wlazować - wchodzić, pozawiyrajóm - pozamykają, chledać - szukać, rozpostrzili - rozciągnęli, kszeft - interes, dwiyrze - drzwi, ostuda - kłopot, strzigać - strzyc, warzić - gotować, pónclok - gliniany garnek.

Tóż miyjcie sie wszedcy dobrze i wisiołego popióntku!