CO TYDZIYŃ PO NASZYMU: Fórt jednokowóż cosi sie dowo wychledać

Tak my jakosi prziwykli, że jak gdo cosi zrobi co to niego patrzi, to je chwolóny pod niebiosa i eszcze ku tymu dostanie za to porem groszy wyncyj do wypłaty. Jo jednakowoż ni móm zamiaru ło tym i ło tych pisać co robióm yno to co do nich należy, ale wychledować inksze wieca. Dejmy na to, ni mogym prziś s tym do porzóndku, skyrs czymu telkowne beki betónu zustały wykidane na kónsek murka, ze zadku muzeum drukarstwa. Insi dycki rychtujóm stare chałupy w kierych kiejsi sie cosi staroświeckigo wyrobiiało, coby w nich nieskorzij taki muzea odewrzić. Ni mogym prziś na to, skyrs czymu ty dwie stare chałupy na ulice Pokoju, w kierych kiejsi dłógi roki egzystowała cieszyńsko drukarnia, nie zustały na to muzeum wyrychtoane. Wszedcy by przeca wiedzieli, że to tam kiejsi ksiónżki sie drukowało i na zicher poradzili by do niego trefić. Może mi kiery rzeknie ? co kómu prziszło do czepani, coby telkowny betón wykidać do tej szkarpy na ulicy Strómej, yno skyrs tego, coby nieskorzij przibudować takóm mjynszóm chałupkem ze zadku. Jak żech sie roz tam tymu prziglóndoł, toch uwidzioł, że porem dni, jedna beczka betónu za drugóm była do tej dziury wykidowano. Prziszło mi na myś, że kie by eszcze egzystowała cymyntownia w Goleszowie, to isto cało jedna szychta na to by zustała zmitrynżóno. Na zicher ta ściana s tego betónu zastawiła wode, kiero dycki porem metróm we wszecki stróny pod nami żynie i podlywo rozmajtóm zielynine i strómy. Tak nóm podobno ta ekologija leży na sercu, a robiymy wszecko, coby łóna yno zustała ni kierym w gymbie.

Mini słownik:

prziwykli - przyzwyczaili się, co do niego patrzi - co do niego należy, wychledować - wyszukiwać, wieca - rzeczy, prziś na to - wpaść na to, skyrs - z powodu, żynie - gna, telkowne - wiele, dużo, kónsek - kawałek, dycki - zawsze, rychtujóm - przygotowują, nieskorzij - później, odewrzić - otworzyć, egzystowała - funkcjonowała, na zicher - na pewno, kiery - ktoś, czepóń - głowa, zmitrynżóno - zmarnowana, dycki - zawsze, strómy - drzewa.

Tóż miyjcie sie wszedcy dobrze i wiesiołego popióntku.