CO TYDZIYŃ PO NASZYMU: Niechać zarobióne pinióndze idzie byle kaj

Zdjęcia F.J. Dral

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Dzisio eszcze roz sie przizdrzymy naszymu rynkowi, coby uwidzieć co sie w łostatnich rokach pomiyniało. Wedla tej cukierni Sissi jacysi macherzi odewrzili kszeft w kierym idzie sie pozbyć pinindzy, jak postawiymy na tych co przegrajóm we fusbal. Jakisi to je w ludziach dziwoki, że ci co majóm niewielki grosz to eszcze chcóm roz dwa sie go pozbyć. Nigdy nie przidzie im do czepani, że coby łóni mógli wygrać to kierysi przeca musi ty pinióndze przegrać. Ale isto zawsze rozmyślajóm, że tym kierysim to nie bydóm łóni i fórt niechujóm tam u nich pinóndze. Kapke dalij był kiejsi kszeft s oblyczkóm dlo paniczek i panoczków, a nazywoł sie "Galux". Downo go uż tam nima, bo dzisio rozmajtóm oblyczke idzie kupić byle kaj. Sóm kszefty w kierych aji s jedzynim idzie se kupić galaty, spodek abo jakómsi jakle.Taki misz masz sie porobił, ale skyrs tego idzie chycić wiyncyj ludzi do kupowanio, bo jak nóm baji przi kupowaniu bótków zawónio wórsztym to na zicher też go tam kupiymy. Kónsek dalij jak przelezymy przez ulucem Matejki to trefiymy na poczte s kierej uż downo ściepali tych sześć liter i uż żodyn letnikorz jak stanie na postrzodku rynku nie uwidzi kaj wciepać kartke, kieróm napisoł swojimu kamratowi. Pore roków tymu jak na tej poczcie rzóndził eszcze jakisi panoczek to mie posyłoł do Biylska do jakigosi ważniejszego pocztorza, coby mi powiedzioł kaj sóm ty litery. Do Biylska żech nie pojechoł, a liter jak nie było tak do dzisia ich nima. Stowani s autami też uż miało tam isto s dziesiyńć kóncepcyji, ale za każdym razym tego placu je tam mjynij i wyglóndo na to, że kierysi robi to tustelokóm nasfol.

Mini słownik:

przizdrzymy-przyjrzymy,
wedla-obok,
macher-fachowiec,
kszeft-sklep,
fusbal-piłka nożna,
czepań –głowa,
niechać-zostawić,
kaj-gdzie,
spodek-spódnica,
jakla-kurtka,
trefić-spotkać,
skyrs-z powodu,
ściepać- zrzucić,
naswol- umyślnie

Tóż miyjcie sie wszedcy dobrze i wiesiołego popióntku!

Dzisiejszy felieton ma tytuł "Kaj wciewpać kartke":