CO TYDZIYŃ PO NASZYMU: Na wiesioło o Koronawirusie

Gdo mi dzisio beje chcioł dokozać, że cudów nima, tak je ślepy, głuchy, abo spod z miesionczka. Cuda były, som, a bydom. Z tym sie nie do nic robić. Podziwejcie sie dzisio kole siebie, odewrzcie okno i co uwidzicie? Nic. Cicho, głucho, prózno. Na ceście żywego ducha, a esi uż sie gdosi pokoże, tak go nima poznać, bo mu jyny oczy widać, jakby wszyndzi chodzili doktorzi, kierzi za chwile bydom operować. Auta też jeżdżom jyny sym tam. Granice też pozawiyrali, tak wszycy siedzymy, jak w jakimsi Getcie. Cały świat umrził, abo co? Tuż co to je? Co sie stało? Jak to je możne? Tego eszcze nie było!!! Gdo mioł takom siłe, aby sie ludzie dali dobrowolnie pozawiyrać w chałupie? Cud, abo co? Gdo sie eszcze nie skapowoł, tak mu to przezdradzym. To je tako mało potwora, kierej ani nie widać, ani nie słychać, a je! Gdosi ji doł miano KORONAWIRUS. Kaj to plugastwo wlezie, tak wszyndzi narobi paskudy. Wszycy, aji ci nejodważniejsi robiom przed nim w gacie. Nie myślijcie se, że strugom frajera. Jo też siedzym doma. Nimom co robić tak wymyślom.Wszyndzi jyny KORONAWIRUS a KORONAWIRUS. Światowo gwiozda! Takij reklamy nimo ani Dustin Hoffman ani Brad Pitt. Nikierzi majom z niego wielkigo lufta, bo przidom o wielki piniondze. Ni abych im to przoła. To zaś ni! Głównie tych małych mi je luto. Ale śmioć sie mi chce z tych, co wymyślajom mode. Baji tako Coco Chanel abo Kevin Klein. Ci se muszom pluć w brode, że uż przed tym Koronawirusym oni nie wymyśleli mode na tom, jak ji to prawiom, rouszke. Bo rachuje sie tyn, gdo je piyrszy. Dzisio uż go mogom jyny opiczyć. Z tym sie nie do nic robić. Żodno agencyja sie nie beje mógła chwolić, że piyrszo wymyśliła mode na rouszke. Na to prziszeł Koronawirus. Choćby teraz robili nie wiym co, prziszli by jyny z krziżkym po funusie. Skryncać ich też beje, że nigdy nie wymyślili mode, kiero by pasowała na każdego. Na starzika, na starke, aji na małe dziecka, a ku tymu, że jom bydzie nosić cały świat! No tak to uż je na nich fakt moc! Z takigo kalibru żodyn z nich nie wystrzelił! Jo wiym, powiycie, że oni aji z tego ukryncom byznys, ale uż nie bydom piyrsi! A świat podziwio dycki tych piyrszych. Tyn zbytek uż go nie zajimo. Nobla nie dostanom. Tuż narobił im ty Koronawirus gulaszu, z kierym nie rachowali. Pokorało ich! Oni uż fakt se nie wiedzieli w zadku rady. Jyny aby byli piyrsi. Jyny aby wymyślili, co eszcze żodyn. Serwirowali światu nejgupszom mode jyny aby dokozać , że som nejlepsi. Podle mie se robili z ludzi srande, a my im na to nalecieli. Gdo dzisio chce być moderny, tak chodzi w cypatych sukniach, we wydrzitych galatach, abo baji w tryczku z dziurom na cycek.

Jedno je w tym dobre. Baby uszporujom na kosmetyke, bo całom parade majom pod rouszkom. Stejnie mało kogo idzie poznać. Każdy wyglondo tak samo piekny, abo stejnie stary. Świat sie przekopyrtnył, a leży na łopatkach, a jakby mioł rozum, porozmyślołby, jako stanyć. Na to ale muszymy prziść my sami, wiycie? Można zmondrzejymy, jak tyn Koronawirus pójdzie w pierony. Na rozmyślani momy teraz czasu dość, tak pójmy po rozum do głowy, a dejmy światu szanse zaś stanyć na nogach. Nie wadźmy sie, miyjmy sie radzi, zacznijmy mondrze uważować, bo tyn Koronavirus wloz aji do naszych ludzkich serc. Można sie nom podarzi go wygnać. Fakt, że to by był cud, ale inkszej cesty nima.

Mini słownik: beje - będzie, dokozać- pokazać, miesiónczek - księżyc, odewrzijcie - otwórzcie, cesta - droga, gdosi - ktoś, jyny - tylko, umrził - umarł, pozawiyrać - pozamykać, skapowoł - domyślił się, potwora - obrzydliwe stworzenie, wielki luft - duża korzyść, przoła - życzyła, mi je uto - jest mi szkoda, rouszka - maska, opiczyć - odgapić, z krziżkym po funusie - z krzyżem po pogrzebie, starzik - dziadek, starka - babcia, dziecka - dzieci, zaimo - interesuje, w zadku rady - mieć problem, sranda - żart, moderny -modny, cypate - spiczaste, wydrzite - wytarte, tryczko - tshirt, uszporować - zaoszczędzić, parada - uroda, stejnie - równo, wadzić sie - kłócić się.