CO TYDZIYŃ PO NASZYMU: Na roz ludzie zaczli kupować yno to, co im je na zicher potrzebnebyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Prziszły na nas taki czasy, że szpacyrować mogymy yno do kszeftów po rozmajte wieca, kiere potrzebujymy dziynnie do gymby wrazić. Skyrs tego ani ni ma ło czym pisać. Żodnych hałdamaszy na mieście też żodyn nie robi, bo prziszeł z wyrchu taki befel, kiery tego zakazuje. Dzisio żech zustoł wysturzóny s chałupy, coby zónś do kszeftu po cosi do zjedzynio. Ni ma to teraz taki leki, coby zaroz do tego kszeftu wlyź, bo w postrzodku może być yno porem ludzi. Odstołech swoji trziszwierci godziny i na kóniec podarzilo mi sie wlyź do postrzodka. Rychlij bych se ani nigdy tego nie wszymnył, że taki cosi może na roz dać ludzióm telkownóm radoś. W postrzodku je cicho jak w kościele, żodyn nie dziwoczy, żodyn sie nie sturko i żodyn nie nacióngo tej oblyczki na sie, kierej całe kupy leżóm tam w tych zieleźnych koszach. Je tam dzisio tak cicho jak rychlij było w czeskich kszeftach. Wszecko sie naroz pomiyniało, bo uż tak nic nie funguje jako kiejsi. Srandowne też było to co widziołech, jak jedyn chłop nie poradził wlyź społym ze swojóm babóm, yno musioł porwać dlo siebie też inszy wózek. Wyjechoł s próznym wózkym, takim s jakim wjechoł, ale mioł s tego tela radości, że poradzioł wachować swojóm paniczke, co i wiela tych wiecy ciepie do swojigo wózka. Rychlij przed kszeftym stoli przeca cały czas wedla siebie, a do postrzodka musieli wlyź, każdy extra ze swojim wózkym. Jak tak talij pudzie to ludzie na dobre odwyknóm od siebie i uż nie bydóm aji we kwartyrach miyszkali społym. Mini słownik: wieca - rzeczy, wrazić - włożyć, skyrs - z powodu, hałdamasz - zabawa, befel - rozkaz, wysturzóny - wypchnięty, kszeft - sklep, trzisztwierci godziny - 45 minut, postrzdek - środek, telkownóm - taką dużą, dziwoczy - wydziwia, sturko - trąca, oblyczka - odzienie, zieleźny - żelazny, rychlij - szybciej, funguje - działa, srandowne - śmieszne, społym - razem, wachować - pilnwać, wedla - obok. Tóż mjyjcie sie wszedcy dobrze i wiesiołego popióntku
|
reklama
|
Dodaj komentarz