CO TYDZIYŃ PO NASZYMU: Czy stare poszkryfane ściany to je zabytek?być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio bydzie ciynżko cosi napisać wiesiołego, jak wszedcy skyrs tego korona wirusa, majóm markotne gzychty. Ło nim ni ma ani uż co rozmyślać, bo wszedcy wszecko wiedzóm i eszcze bych cosi na zadni góny nazbiyroł, jakbych napisl cosi łopacznie. Prziszło mi dzisio tak jak kiejsi, przynś sie po mieście i podziwać na chałupy w kierych odewrzity zustoł nowy kszeft, abo kiery je do przedanio. Podarziło mi sie też zrobić fotkem Dómu Narodowego pod kierym nie stoji żodne auto, a jak żech sie obrócił i spozdrził na rynek to na nim nie było żodnego tusteloka. Nejciynżyj w tych czasach majóm gołymbie, bo żodyn nie bydzie im ciepoł jedzynio, a łóne uż isto przepómniały jako sie dziubie do chroboków we świyżej łoraczynie. Na Zamkowej na kierej też nie szło uwidzieć ani kónska człowieka, spółniołech se na tyn kszeft, w kierym szło kiejsi dostać tajle do rozmajtych aucisków. Nejprzód tam był Motozbyt, w kierym stoł za ladóm pón Kozieł, a nieskorzij zaś Polmozbyt kiery kludziła jego cera pani Macurowa i zdało sie, że to tam bydzie wiecznie. Naroz sie wszecko zmizło, bo prziszeł internet i każdy poradzi se wszecko obsztelować aji przez telefón i nie musi ani zadku ze stołka dźwignóć. Po tym kszefcie zustała yno pomalowano jedna ściana, kiero dzisio wyglóndo jak staroświecki grafiti. Możne, że nikiere s tych malunków majóm uż wiyncyj niż pińdziesiónt roków i bydzie to zabytkym. Trzeja to zgłosić do kónserwatora, coby żodyn tej ściany nie zababroł, na kierej do dzisia idzie uwidzieć taki nostalgiczne miana: - Motocykle WSK 125 -175, - Fiat 125p, - Fiat 126p, -P olonez i - Motorower Romet. Mini słownik: skyrs - z powodu, gzycht - twarz, zadni góny - tyłek, łopacznie - odwrotnie, odewrzity - otwarty, kszeft - sklep, spozdrził - popatrzył, chrobok - robak, kónsek - kawałek, tajle - części, ciepoł - rzucał, nieskorzij - później, kludziła - prowadziła, zmizło - zgubiło, poradzi - potrafi, zababroł - zamazał, miana - nazwy. Tóż mjyjcie sie wszedcy dobrze i wiesiołego popióntku
|
reklama
|
Dodaj komentarz