CO TYDZIYŃ PO NASZYMU: Jak sie je nimocnym, to lepszyj legnóć se we szpitolubyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Pasowałoby tak jak insi to robióm napisać cosi ło tym, że prziszeł na nas tak czas, że ani nie trzeja przeziómbnóć, ani nogi złómać, a idzie stać sie nimocnym. Niech sie ło to starajóm insi, kierym za to płacóm, bo przeca wszedcy naroz nie bydóm nimocni i gdosi chodzić do roboty musi. Dzisio żech jechoł żóltym autobusym w kierym szofer na każdym przistanku mazoł se rynce jakómsi modróm wodziczkóm, a nieskorzi chytoł nimi wolant. Jak żech to tak porachowoł wiela razy na szychte bydzie musioł mazać se ty rynce, to mi wyszło, że na dziyń wybabrze isto cały żber. Tak rozmyślóm, że nie ło to mazani sie przeca rozchodzi, ale raczyj ło, to czy go rynce nie zabolóm i wolant sie mu s rynki nie wyślizgnie. Ci szoferzi uż przeca nie sóm tacy młodzi i nie wiym czy nie lepszyj by dlo nich tyn wolant dzierżeć w rynkawiczkach, coby im rynce nie osłabły i po wolancie sie nie kielzały. Lepszyj sie majóm wojocy i fojermóni, kierych posłali na granice w Boguszowicach, bo se siedzóm w autach i czakajóm na ludzi s gorónczkóm. Lepszyj by było, coby gdosi wyszpekulyrowoł taki sak na chytani tych wirusów, coby ci wojocy na tej granicy nie stoli po darmu. Dobrze, że ni ma śniega i ci fojermóni s wojokami tam nie marznóm, bo eszcze łóni by sie nabawili jakisi rymy i trzeja by było jakichsi inszych wojoków najóńć. Czesi isto by nóm nie prziszli pumóc, bo łoni zawrzili granice i uż żodyn przez nie nie przelezie. Całe szczynści, że tego pieróństwa nie przenoszają ptoki, bo uż na to, ani wojocy s Ameryki by nic nie pumógli. Mini słownik: insi - inni, nimocny - chory, modróm - niebieskóm, nieskorzi - później, chytoł - trzymał, wolant - kierownica, mazać -smarować, wybabrze -wysmaruje, żber - duży pojemnik, dzierżeć - trzymać, wojocy- żołnierze, fojermóni - strażacy, gdosi - ktoś, wyszpekulyrowoł - wymyślił, chytani - łapanie, ryma - katar, isto - zapewne, zawrzili - zamknęli, żodyn - nikt, Tóż mjyjcie sie wszedcy dobrze i wiesiołego popióntku
|
reklama
|
Dodaj komentarz