CO TYDZIYŃ PO NASZYMU: Ludzie tak sfajnieli, że chcóm mieć kościół wedla chałupy

”...przi drugim je tela placu,że yno...". fot. FJD

”...lepszyj je iś do kościoła szłapcugym...". fot. FJD

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Fórt my sóm eszcze w Marklowicach, bo jak kiery nie wiy to łóne teraz patrzóm ku Cieszynu. Jak wypolymy ze skryntu to za tóm sztrekóm, kiero przeżino cestem nie idzie nie uwidzieć potawiónych wedla siebie dwóch kościołów. Dlo Poloków, kierzi do nas przijechali skónsi aże s Polski je to jakisi dziwoki, że dwa kościoły stojóm wedla siebie. Tustelocy dobrze wiedzóm ło co sie rozchodzi i nima to żodnymu zocne. Idzie yno rozmyślać ło tym czy tyn co stawio kościół nieskorzij nie robi to kpke łod zowiści. Tyn piyrszy kościółek, co uż tam stoi chyba ze trzicet roków i je kapke miynszy i mo placu do stawianio autów małoś niewiela. Za to przi tym drugim je tela placu, że yno na Dominikańskim w Cieszynie je możne go kapke wiyncyj. Tak se myślym, że tustelocy se go postawili coby mieć go bliżyj chałup i w każdym razinku szłapcugym sprziś do niego se porzykać. To chodzyni do kościola pieszki nima taki iste, bo w niedzielem je tam tela aut, że nima kaj palca wrazić i wyglóndo to raczyj na giełde autowóm. Kiejsi do kościoła chłopi i baby szli wysztrychniyńci w to co mieli nejlepsze w odmaryjach, a dzisio przijyżadżajóm tym co majóm nejlepsze w garażach. Przeca autu to je jedno czy stoji w garażu czy jedzie jedyn kilometer. Tak czy tak motór sie nie zagrzeje, a łostudy przi wsiadaniu do auta w wybiglowanych i nejpiekniejszych szatach paniczki majóm sto światów. Rozchodzi sie ło to, że w popuczónych ancugach i szatach człowiek zaroz sómsiadóm ciepie sie na łoczy, kierzi zawdy wszecko widzom. Tymu też, isto lepszyj je iś do kościoła szłapcugym i uszporować cosi na zielosku, kiere nasze szaty pieknie wybiglowało.

Mini słownik: