CO TYDZIYŃ PO NASZYMU: Dzisio sztróm to moc przidajno wiec

.”...pomprawo eszcze dwie miynsze chałupki...”. fot. FJD

”Zaś nad cetóm idóm dróty ze sztrómym...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Dróty ze sztrómym

Niewiela uż je wiecy do łoglóndanio na tej ceście ku “Lakieróm”, ale cosi sie przeca eszcze nóndzie. Po lewo kansi w połowce tej cesty je zawrzito zarzowiało brama na kierej szuro wisi tabula ze srandownym napisym. A rozchodzi sie ło to ,że za tóm bramóm idzie niechać “obojętne odpady”, bo tak na tej tabuli napisoł MZD. Dłógoch rozmyśloł nad tym jaki to sóm ty “obojętne odpady”, ale nic mi móndrego do czepani nie wlazło. Możne, że rozchodzi sie ło to, że jak pujdymy kelem wywalónej tam kupy ździorbów to nóm to bydzie “obojętne” co, kiedy i gdo tam wywalił. Moc wiecy człowiekowi je obojynte, abo też prawióm, że mu to wisi, ale ło łodpadach obojyntnych słyszym piyrszy roz. Możne, że jak to gdo poczyto s dyrekcyji tego MZD to wartko dopiszóm kómu i kiedy ta kupa odpadów mo być obojynta. Kapke dalij stojóm po prawo eszcze dwie miynsze chałupki w kierych isto ludziska majóm uż doś krawalu łod tych aucisków, kiere dziynnie wedla nich gzujóm. W tej piyrszej miyszkajóm jacysi szprytniejsi ludzie, bo widać, że dbajóm o swoji zdrowi. Nasadzili se przed chałupóm moc smreków, kiere ich łod tego krawalu chrónióm. Zaś nad cestóm idóm dróty ze sztrómym, ale nie wiym w kieróm strónem łon leci, bo tego s cesty nie widać. Możne, że je to tak s Czechami domówióne, że gdo go mo dejmy na to dzisio wiyncyj to posyło kamratowi. Je to porynczne, bo dróty to nima waserlajtung co w każdej rułce idzie inkszo woda, a sztróm może iś w łobie stróny tym samym drótym i nic nie prasknie. Ty dróty wiszom nad cestóm s wielkóm zwyżkóm i żodnymu autu nie zawadzajóm.

Mini słownik:

wiec - rzecz,

cesta - droga,

nóndzie - znajdzie,

kansi - gdzieś,

zawrzito - zmknięta,

szuro - krzywo,

srandowne - śmieszne,

czepań - głowa,

ździorba - graty,

krawal - zgiełk,

gzuć - pędzić,

smrek - świerk,

sztrom - prąd,

waserlajtung - przewód wodny,

zwyżka - wysokość.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Dróty ze sztrómym".