CO TYDZIYŃ PO NASZYMU: Kiejsi farby s "Lakierów" kupowało sie yno po znómości

"...kszeft s farbami i mianuje sie “Dekoral”...". fot. FJD

”Dalij cesta przerzino sztreke...". fot FJD

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Zdało mi sie, że uż dzisio pujdymy ku Pogwizdowu, bo wszecko przed Lakierami je obezdrzóne. A tu mosz, przeca eszcze cosi idzie uwidzieć. Zaroz przi płocie stoji tam tako wielko chałupa, na łoko isto łośmio piyntrowo w kierej jak starzi lakierowcy prawióm cosi sie miało eszcze wyrobiać. Po tym był napad ,coby tam na partyrze zrobić jakómsi sale zbornóm jak to prawił pón J. Mendrek, a na kóniec przerobili to na kwartyry. Dzisio wystowo ponad wszecki chałupy i jesi gdo mo ś ni łokna na lakierowski werk to poradzi widzieć co jego baba, abo chłop robi całóm szychtem. Kapke dalij na skryncie egzystuje jakisikej INWEX w kierym idzie se kupić chlyb, żymły, a jak gdo je przi pinióndzach to aji wszelijaki ciostka. Zaś genał na samym skryncie eszcze też dycho kszeft s farbami i mianuje sie “Dekoral”. Kiejsi jak mi tustelocy prawili nazywoło sie to “Polifarb Market” i szło tam kupić społym s farbami aji inksze wieca. Łóne na iste potrzebne sóm nóm jak kupiymy se nowy kwartyr, abo jak sie przekludzómy do inkszego. Dzisio w takim naszym małym Cieszynie kaj sie prawie nie stawio nowych wielkich chałup, mómy aże trzi wielki kszefty s wszelijakimi wiecami, kiere przydajne sóm w naszych kwartyrach. Czasym tak rozmyśłóm co sie s tymi kszeftami stanie jak razinku bratrzi Czesi zawróm "statni hranice" przed uchodźcami. Uż yny do oglóndanio zusoł nóm przistanek po łubu stronach cesty kaj stowajóm autobusy, kiere jadóm ku Cieszynu abo ku Pogwizdowu. Dalij cesta przerzino sztreke na kierej obstoły sie eszcze rampy, kiere spuszczane sóm jak jedzie tych pore cugów do Cieszyna, abo ku Zebrzidowicóm.

Mini słownik: