CO TYDZIYŃ PO NASZYMU: Kiejsi pytali my, coby do nas ludzie przijyżdżali do roboty, a dzisio je na łopak

"...pisze na tej tabulce visitorym". fot. FJD

”...jakosi sie obstoły dwa garaże...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Skónsi s Polski

Kómusi sie to nie spodobało coch łostatnio napisół i dzisio trzeja bydzie eszcze ku tymu cosi dołożyć. Zacznymy łod tego, że coby wiedzieć kaj auto postawić jak tam do nich przijadymy, to na iste trzeja wiedzieć kim sie je. Czy gościem czy jako tam pisze na tej tabulce visitorym. Lepszyj by było napisać LG, bo tak my kiejsi prawili na tych kierzi sie stawiali, że sóm lepszymi gościami. Kapke wyżyj jak dźwignymy łoczy to widać łoblezióny s modrej farby taki plechowy daszek nad łoknami. Nima to dobróm reklamóm dlo werku kiery isto ty farby robi, ale możne, że ty farby mają taki wziyńci, że żodnymu to nie zawadzo. Kiejsi jak prawie połówka tej farby co tam namiyszali jechała na wschód to żodyn nie stoł ło to, coby wiedzieć czy łóna tam kansi łodlazła s plechu czy ni. Jak sie zwyrnymy i bydymy sie brali spadki ku Marklowicóm to przyndymy kole takigo pómnika, kierego eszcze nie przerobili na swoji kopyto. Fórt je tam napisane, że je to Maria Skłodowska-Curie i je nadzieja, że uż to tak na wieki zustanie i żodnymi nie przidzie nic gupigo do czepani. Zaroz za nióm stoji jedyn s piyrszych bloków w kierym miyszkali wszedcy ci co zustali napytani przez Cieszynioków do roboty i przijechali do nas aże skónsi s Polski. Do dzisia w tej chałupie jakosi sie obstoły dwa garaże, kiere downij zawsze na Gody wynajyte były do kszefcynio karpami. Niewiela ludzi uż pamiynto ty dnie w kierych kszefcili tam karpami Wiluś, a potym Edek ze zwiónsków zawodowych. Zaś na kóniec szychty wszedcy ludzie s amprami pełnymi karpów ciści sie do autobusa w kierym szoferowoł pón Skoczylas. Dzisio jedni to spóminajóm ze łzami w łoczach, a drudzy udowajóm,że im muzg wypoliło.

Mini słownik:

kaj - gdzie,

kiejsi - kiedyś,

sie stawiali - udawali,

kapke - troszkę,

isto - chyba,

zawadzo - przeszkadza,

kansi - gdzieś,

plech - blacha,

zwyrtnymy - obrócimy,

czepań - głowa,

napytani - namówieni,

obstoły - uchowały,

kszefcić - handlować.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Skónsi s Polski".