CO TYDZIYŃ PO NASZYMU: Do stodoły po fajrancie "...je też zogródka s parazolami...", fot. Ewelina Szuścik  "...wlyźcie na cosi zimnego do "Stodoły", fot. Ewelina Szuścik  "...zapraszóm ku Zómku, kaj bydzie kiermasz kapel...", fot. mat. pras. być zawsze do prawjynio gotowo a jak cie uż żodyn nie bydze rozumioł to jyny wiater bydzie po naszymu szumioł" W zeszłym miesióncu szolóntali my sie kole Zómku. Dzisio sie przyndymy cestóm prosto na Strzałów.Tam zaroz za mostym po prawej strónie je fajno gospoda, co sie mianuje "Stodoła". Nie wiym czymu jóm tak smianowali, bo stodoły tam żodnej wóbec nie było. Kiejsi tam yny szło dostać szumne olmaryje, szranki do kuchynie i inksze meblowe wieca. Przed "Stodołóm" też tam była eszcze jakosi gospoda, ale mało gdo spamiyntoł jako sie óna mianowała. Przi tej chałpie kole Pietrówki, je też zogródka s parazolami kaj wewielki hyc idzie wypić zimy bir w kryglu. Trefi sie też czasym, że idzie se tam kupić grilowane jelito i wurszt. W postrzodku "Stodoły" przez lato, zbiyrajóm sie wieczór tustelocy coby trefić znómych, wypić piwko i podrzistać o wszeckim. Dycki łopowiadajóm tam roztomajte wice i błoznujóm s tych wszeckich móndroków w rzóndzie. Kie zaś przidzie zima, to je taki wyszynk kaj wóm aji bir zgrzejóm, coby was w hyrtóniu potym nie szkrobało. Dlo tych co poradzóm grać w kulki, je tam szumny stół bilardowy na kierym idzie aji zagrać w skokanego, bo łón je ustawióny kapke szuro s kopca i biere gona jednóm stróne. Dycki to nie zawadzo tym kierzi tam grajóm, bo jak kierymu uciecze bila tak je skyrs tego mocka srandy. Ci co sóm utropiyni po robocie i nie zdo im sie na gupoty, tak se mogóm na plaskatym pudle pooglóndać tych błoznów, co gónióm za fusbalym. Inksi zaś kierym fusbal ni ma zocny, ani też grani w kulki, to zaś grajóm w szachy abo sie cyganióm w karty i potym sie przeżyrajóm do srandy kiery piyrszy stawio piwko. Dycki je to gospoda, kaj wszedcy sie znajóm i po sztyróch tam stela żodyn nie idzie, bo zwyrtno szynkareczka wachuje i tym chycónym nic s procyntym uż nie sprzedowo. Czasym też idzie sie tam dowiedzieć, jako to hańdownij bywało na dziedzinie, bo mocka ludzi kierzi tam chodzujóm od pokolyń miyszko w Zybrzidowicach. Kie byście jechali przez naszóm dziedzine 15.08.2014r. to wlyźcie na cosi zimnego do "Stodoły". Potym zaś zapraszóm ku Zómku, kaj bydzie kiermasz kapel pt. "Piosenka żeglarska", a ku wieczoru zagro zespół disco polo Vojager, co szumnie śpiywo,że "Polskie dziewczyny najładniejsze są". Mini słownik: kole - koło (czegoś) Miyjcie sie wszedcy dobrze i wiesiołego popióntku! Dzisiejszy tekst ma tytuł: "Stodoła".
|
reklama
|
|||||||||||||||
|
Dodaj komentarz