Przi niedzieliczce coby nie zapómnieć naszej rzeczy: Izby do spanio

”...miejsc na spani je tam yno dwcetsiedym...”. fot. FJD

”...plac do zbiyranio starych zielaznych ździorbów...”. fot. FJD

”...zacznóć wieszać fotki na werkach tych móndroków kierym łóne zawadzały". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Izby do spanio

Cosi dzisio mie naponukło coby eszcze roz sie przizdrzić tymu “Campingowi Olza” i cosi ło nim napisać. Tóż przedstowcie se żech sie dowiedzioł, jako to kierysi bolawie piyńć roków tymu zaprojektowoł, a potym postawił, tak do dzisia je to niewydarzóne. Recepcyja je tak wielko jak w jakimsi grand hotelu, a miejsc na spani je tam yno dwacet siedym. Żodnymu nie prziszło do czepani, że autobusy dzisio sóm tak wielki i majóm nejmiynij pińdziesiónt placów, że każdo wycieczka, kiero by chciała obezdrzić nasz piekny Cieszyn nie bydzie miała kaj czepani zeprzić. Musiało to trwać aż przeszło piyńć roków coby prziś na to, coby tych pore kamerlików co tam sóm za tom recepcyjóm ze zadku prugować przerobić na izby do spanio. Przeca lepszyj było postawić jednóm porzóndnóm chałupe w kierej by było wszecko, a ku tym szło uszporować na jednych gruntach i jednym dachu, ale to uż tak dycki je jak sie stawio chałupe ni za swoji pinióndze. To wszecko je tam jakisi dziwoki, bo przedstowcie se, że aji tyn szportplac na kierym kiejsi kopali do balóna fusbaliści s Piasta je pojczowany na godziny. To przeca sie nie godzi coby nasz zasłóżóny klub ni mioł swojigo szportplacu i musioł kopać we fusbal na pojczanej rajczuli i rachować sie s tym, coby nie zustać tam stela przegnany. Jak pokroczymy kapke dalij to uwidzymy jak sie kómusi podarziło przerobić werk, kiery wyrobioł dobre zofty s ekologicznych jabłek, trześni, wyngierek i eszcze inkszych rosmajtych owoców na plac do zbiyranio starych zielaznych ździorbów. Prziszeł mi do czepani taki napad coby zacznóć wieszać na cieszyńkich werkach, kiere zustały zawrzite miana i fotki tych móndroków kierym łóne zawadzały.

Mini słownik:

naponukło - przyszło do głowy,

przedtowcie se - wyobraźcie sobie,

bolawie - byle jak,

czepań - głowa,

prziś na to - mieć pomysł,

kamerlik - pomieszczenie,

grunta - fundamenty,

uszporować - zaoszczędzić,

rajczula - ogrodzone pastwisko,

dycki - zawsze,

szportplac - boisko,

fusbal - piłka nożna,

werk - fabryka,

zoft - sok.

Mjyjcie sie wszedcy dobrze i wiesiołej niedzieliczki.

Dzisiejszy tekst ma tytuł ”Izby do spanio".