CO TYDZIYŃ PO NASZYMU: Łod tego wachowanio jedyn drugigo, piniyndzy na zicher nie przibydzie

Dzisio bydzie ło dwóch takich, kierzi byli ciulani przez tego trzecigo. We strzode chynyli mi sie nałoczy tacy trze chłopi, kierzi sprawowali taki szyrszy trotuar wedla ulicy Korfantego. Mieli te robotem tak pochytanóm, że nie szło od nich łoczy łoderwać, bo jedyn ś nich stoł i gajdowoł cosi na telefónie, a dwa halangrzi czympieli przi ziymi wedla niego. Nie wiym skyrs czymu kierysi aże trzóch naporynczył do tej roboty, jak jedyn ś nich, nic nie robił yno stoł, a zadek zeprzity mioł na gelendrze. Kiejsi takigo wachtorza, kiery inszych gnoł do roboty nazywali brygadzistóm, a dzisio trzeja by isto pochledać mu jakisi insze miano. Bo gdo to widzioł, coby dwóch miało spocóne czoła łod roboty, a tyn trzeci ganc sie na nich ani nie dziwoł, yno szmyroł palcym po telefónie. Tak rozmyślóm, że to je i tak dobrze, że ni ma to na łopak i eszcze fórt je wiyncyj tych co robióm, a miynj tych co wachujóm. Ale możne, że kiejsi przidóm taki czasy, że uż żodyn nic nie bydzie robił, a wszedcy bydóm yno wachtorzami. Mómy dzisio takóm modem na wachowani i wszedcy wszeckich chcieli by wachować, a robić ni mo gdo. Po połedniu w rotuzie siedzi wachtorz i ni wiym czego tam wachuje, bo przeca ni ma tam żodnych piniyndzy, ani inszych wiecy, kiere szłoby przedać i cosi na nich utar-żyć. W tych wiynkszych kszeftach też sie plyntóm tacy rozmajci obleczóni po czornu, kierzi wachujóm, coby żodyn nie uciyk bez płacynio s łogórkym, marekwióm abo s jakómsi starszóm kelerubóm. Mało isto gdo wiy, że płat kiery łóni dostowajóm je wrachowany do każdej wiecy, kieróm tustelocy u nich kupujóm.

Mini słownik: ciulani - wykorzystywani, na zicher - na pewno, wieca - rzeczy, strzoda - środa, chynyli - rzucili, sprawować - naprawiać, wedla - obok, pochytanóm - zorganizowaną, gajdować - nie umiejętnie coś robić, halangier - pomocnik, czympieć - kucać, naporynczyć - polecić, zeprzity - oparty, gelendra - poręcz, wachtorz - wartownik, pochledać - poszukać, miano - nazwa, nie dziwoł - nie patrzył, ganc - całkiem, szmyroł - pocierał, fórt - ciągle, wachować - pilnować, rotuz - ratusz, utar-żyć - zarobić, keleruba - kalarepa, marekwia - marchefka, kszeft - sklep, obleczóni - ubrani, płat - pensja.

Tóż mjyjcie sie wszedcy dobrze i wiesiołego popióntku