CO TYDZIYŃ PO NASZYMU: Brezli ze suchej bułki, uż żodyn dzisio nie robi

Tłósty sztwortek momy za sebóm i mało gdo isto wiy, skónd łón sie wziył i czymu każdego roku je w inkszy dziyń. Wyrachowane to je tak, coby jak przidzie post przed Wielkanocóm, szło by sie w tyn łostatni sztwortek najeś kreplików. Kiejsi taki krepliki były nafilowane szpyrkóm, boczkym i inkszym miynsym, bo dycki ludzie wiedzieli, że s marmulady muskle żodnymu nie urosnóm. Możne, że skyrs tego, dzisio trzeja tych kreplików do siebie weprać wiyncyj, coby nabrać siły przed Wielkanocóm. Zustało to tak rozegnane, że uż żodyn nie wiy skyrs czymu akurat w tyn sztwortek ty krepliki trzeja kupować, bo dzisio styknie yno cosi w telewizorni, internecie i na fb ciknóć i uż wszedcy lecóm jak muchy do miodu. Latoś tustelocy nakupili kreplików wiela wlezie i roz dwa mieli zadki pełne, bo nieskorzi w pióntek rano szło uwidzieć w hasioku wyciepane nie napoczynte kiśniczki s kreplikami. Jo se spóminóm, że kiejsi żodyn ani suchej skibki chleba nie wyciepoł, a co dziepro rzeknóć o pochyniónych kreplikach. Aji tako bułka jak kómusi uschła, to wartko ś ni zrobili brezle w kierych wolało sie nieskorzij faszyrki, abo insze kotlety. Suchy chlyb jak kómusi nadbył to zjadła go gowiydź, bo był upieczóny s obilo, kiere urosło w normalnej ziymi nie posutej prószkami. Skyrs tego wszecki kohótki, trusioki, kaczki i gynsi, kiere sie tego nadziubały miały miynso, kiere godziło sie do jedzynio zaroz po zabiciu. Był też taki zwyk zbiyranio suchego chleba po chałupach i wożynio go na dziedzine do siedloków. Tustelocy moczali go we wodzie, coby babucie se na nim nie połomały zymbów, jak go nóndóm w korycie.

Mini słownik: sztwortek: - czwartek, inszy - inny, kreplik - pączek, nafilowane - nadziewane, szpyrka - słonina, dycki - zawsze, skyrs - z powodu, weprać - wepchnąć, ciknóć - bąknąć, wiela wlezie - ile wejdzie, nieskorzi - później, hasiok - śmietnik, wyciepane - wyrzucone, kiśniczki - pudełka, obili - zboże, skibka - kromka, brezle - bułka tarta, faszyrka - kotlet mielony, gowiydź - ptactwo domowe, trusiok - indyk, zwyk - zwyczaj, dziedzina - wieś, siedlok - rolnik, babuć - tucznik, nóndóm - znajdą.

Tóż mjyjcie sie wszedcy dobrze i wiesiołego popióntku