CO TYDZIYŃ PO NASZYMU: Stojóm dwa ludzie

Porem dni tymu trefilech przi rynku na porem chłopów, kierzi mieli na sobie ancugi policmajstrów i miastowych wachtyrzi. Dowali sie ze sebom do rzeczy, coby na ceście postawić cosi przidajnego do haltowanio aut. Rotuz kozoł cosi wyszpekulyrować, coby po rynku uż żodyn nie jeździł i nie stoł też tam ze swjim auciskym, bo je dzisio moda na ekologije. Rozchodzi sie przeca ło to, coby szło sie bez żodnej łostudy podziwać na ty wszecki piekne chałupy i na tyn nasz rotuz, bez szpica. Bo jak ukludzili tyn strómek po Godach i ty świycónce sónki, to uż wubec ni ma na czym łoczy zeprzić. Jedynóm dekracyjm na rynku, to je tyn nasz Floryjan abesrany przez gołymbie, a niekiedy wedla niego stojóm dwa ludzie s gesztelym, na kierym przirażóne sóm insztrukcyje, jako sie bado pismo świynte. Nie wiym, nad czym tu je potrzebne telkowne rozmyślani, jak uż insi przeca prziszli downo na to. Dejmy na to, taki Rybnik fundnył se taki zieleźne hrube kuliki, kiere sie same ze ziymi wystyrczajóm, jak kiery mo napad na jejich rynek wjechać. Nie trzeja wrażować do ziymi żodnych cestowych znaków, ani stawiać przi nich żodnego miastowgo wachtyrza, bo po takim zieleźnym kuliku przeca żodne auto uż nie przejedzie. Gorzij by isto mieli ci kszewciorze na rynku, bo cały towor i insze wieca musieliby przenoszać na swoich plecach. Tego bych im przeca nie życzył, bo roz dwa drobiliby sie możne aji jakigosi pukla na plecach, abo eszcze inszych boleści, a to by nie stoło za to. Sóm eszcze insze wynalazki, kiere by poradziły wszecki auta, skludzić s rynku, ale to by isto zaś moc piniyndzy kosztowało i mogym sie załóżyć, że żodyn nic w tej materyji uż nie zrobi, bo przeca eszcze roz za kiedy jakisi auto musi pod rotuz przijechać.

Mini słownik: trefiłech - spotkałem, ancugi - ubrania, policmajster - policjant, wachtyrz - wartownik, cesta - droga, przidajne - pomocne, halować - zatrzymywać, rotuz - ratusz, łostuda - kłopot, podziwać - popatrzeć, ukludzili - sprzątnęli, Gody - święta, wubec - na pewno, zeprzić - oprzeć, wedla - obok, gesztel - stojak, przirażóne - przymocowane, telkowne - tak dużo, fundnył - ufundował, kuliki - słupki, napad - pomysł, wrażować - wkładać, zieleźny - żelazny, kszefcorz - handlarz, pukiel - garb, skludzić - uprzątnąć.

Tóż mjyjcie sie wszedcy dobrze i wiesiołego popióntku