CO TYDZIYŃ PO NASZYMU: Szport to je przidajno wiec, bo ruszo wszecki kościbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Prziszła mi tako refleksyja, a po naszmu napad, coby napisać ło ludziach, kierzi poza szportym inszego świata nie widzóm. A wziyło sie to skyrs tego, jak żech uwidzioł zeszły tydziyń, jak taki wielki auciska suły piosek wedla Floryjana na cieszyńskim rynku. Tyn piosek był potrzebny yno poru chłopóm i poru babóm, kierzi chcieli se pochybać balónym przez rozciongnióne na porzyk sito. Kiery prziszeł i na to, coby w to sito grać na piosku tego nie wiym, ale na zicher żodyn kolan se nie połodziyro, ani rzici na tym piosku se nie postrzasko. Ku tymu eszcze yno dwo grajóm po każdej strónie i skyrs tego co chwila balón zamias w lufcie leży na piosku. Lepszyj i łacnił przeca by było, tych uwziyntych chłopów, kierzi chcóm kulać sie w tym piosku, zawiyś tam jak kaj tego piosku je doś. Dobrze by też było zrobić ś nimi takóm rajze aże nad nasze morze, kaj tego piosku sóm całe kupy. U nas nejbliżyj mieliby do Kóńczyć kaj eszcze funguje żwirownia, kiero by mógła nałosiywać im tego drobnego piosku. S tym granim w sito to je eszcze pół biydy, bo s tego co wiym, to gro sie też na twardej ziymi, abo pod dachym na delinach. Insi szportowcy to dziepro majóm namiyszane w głowach. Bo dejmy na to tacy kolarze, kierzi jeżdżóm se sebóm na przedbiyżki, majóm przerozmajte koła na kierych idzie jeździć po ceście, po gorach, po torze, abo kiery rychlij przejedzie jedyn, abo dwa kilometry. Sóm też tacy co na nich chópkajóm do luftu, abo tacy co ni majóm uż żodnego stracha robić na nich salta w lufcie. Tak samo je s inszymi szportami, ale ło tym to napiszym kiejsi nieskorzij. Mini słownik: napad - pomysł, skyrs - z powodu, suły - sypały, pochybać - porzuca, balón - piłka, prziszeł na to - wpadł na to, na zicher - na pewno, połodziyro - podrapie, ani rzici - ani tyłka, skyrs - z powodu, w lufcie - w powietrzu, łacnij - taniej, kulani - turlanie, kaj - gdzie, funguje - funkcjonuje, deliny - podłoga, dziepro - dopiero, przedbiyżki - wyścigi, cesta - droga, rychlij - szybciej, chópkajóm - skaczą, nieskorzij - później. Tóż miyjcie sie wszedcy dobrze i wisiołego popióntku!
|
reklama
|
Dodaj komentarz