CO TYDZIYŃ PO NASZYMU: Podłógowato tabula

"...kszaft ze trómkami ,christami i inkszóm zielyninóm". fot. FJD

"...ze zadku tej tabuli napisane je Goodbye...". fot. FJD

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Trzeja rzeknóć, że szpacyrowani po tej Frysztacki idzie ganc fajnie, bo miasto sie zlitowało i pore roków tymu i wykidało na nióm nowy asfat. Po łobu strónach dorobili też piekne tretuary na kierych widać ludzi, kierzi dziynnie po nich drepszóm. Zaroz za wiaduktym kómusi prziszeł taki napad do czepani, coby odewrzić kszeft ze strómkami, chrostami i inkszóm zielyninóm. Nimo to bardzo wielki, ale możne, że to styknie dlo tych zogródków, kiere tam sóm wedla niego. Zaroz przi jego bramie stoji tako doś wielko modro podłógowato tabula s kierej sie mogymy dowiedzieć, że jak pujdymy przed sie 3 km to dóndymy do resztek kiejsi pieknego Polifarbu. Dzisio ta fabryka je przechrzczóno na jakisi PPG, ale uż żodyn nie napisół jaki farby tam robióm. Zaś ze zadku tej tabuli napisane je Goodbye i nie wiadomo dlo kogo to je? Zaroz wedla trefiymy na krziżowatke s ulicom Krętą, przi kierej stoji krymowo mało parterowo chałupka. Nie byłoby w tym nic zaimawego, bo takich chałupek je wszyndzi pełno, ale w ni akurat je bar ”Zaciszny kątek” .Nie byłech tam w postrzodku, ale wszymóm se, że żodyn bar ni może być zaciszny chyba, że chłopi pijóm tam yno wodem abo mlyko. Kónsek dalij trefiymy na maluśki cestowy mostek pod kierym ciurczy pomalutku potók Kalembianka. Jako gdo prziszeł na to, co by go tak zmianować tego nie wiym, bo na żodnej mapie ani w Googlach nic takigo nie idzie nónś. Możne to miano mo isto tymu, że żródełko wybijo w Kalymbicach i to miano patrzi sie tej dziedzinie.

Mini słownik: