, wtorek 15 października 2019
CO TYDZIYŃ PO NASZYMU: Dzisio jechać cugym, to uż ni ma żodno atrakcyjo
Rozmajte nowe wieca idzie uwidzieć w naszym pieknym Cieszynie, bo przeca fórt cosi sie stawio i ruchtuje do porzóndku. Taki dejmy na to, tyn nasz nowy banhof wyglóndo dzisio jak s jakisi wielki metropolije. fot: FJD



Dodaj do Facebook

CO TYDZIYŃ PO NASZYMU: Dzisio jechać cugym, to uż ni ma żodno atrakcyjo

FJD
Szpacyrkym po Cieszynie
“Gdo sie za swój jynzyk wstydzi takim niech sie każdy brzidzi”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Gzujóm za granice

Rozmajte nowe wieca idzie uwidzieć w naszym pieknym Cieszynie, bo przeca fórt cosi sie stawio i ruchtuje do porzóndku. Taki dejmy na to, tyn nasz nowy banhof wyglóndo dzisio jak s jakisi wielki metropolije. Stojóm na nim cugi, kiere aji gzujóm za granice i jak kiery do nas tu przijedzie ze świata i podziwo sie na tyn banhof, to isto łoczy wybałuszy. Gorzij jak wsiednie do tego czeskigo vlaku, to dziepro sie dowiy, że łón yno trzicet kilometrów pojedzie i za jakisi czas przepnóm mu damfule i wróci sie spadki ku Cieszynu. Za to tym cugym, kiery jedzie ku Zybrzydowicóm, idzie dojechać aże do Katowic bez przesiadanio. Fórt jednakowóż do Biylska cugym nie idzie sie s Cieszyna dostać, bo sztreka je zar-zowiało, a kable łod sztrómu uż downo kierysi poustrzigowoł. Ale za to, jak kierysi sie podziwo na ty nasze żółte autobusy i uwidzi na jednym ś nich nomero pińdziesiónt, to se isto wszymnie jaki tyn Cieszyn je wielki. Jak autobus mo przeca taki wysoki nomer, to na zicher każdy se bydzie wszymoł, że to miasto musi być wielgucne i kansi ta reszta nomerów musi przeca se nónść swój plac. Ło inszych autobusach uż nima ani co pisać, bo każdy mo inszóm barwe i do kierego trzeja wlazować wiedzóm yno ci, co uż porem razy pojechali ganc w inszóm strónem i nieskorzij musieli iś piechty spadki. Dycki to je tak, że jak człowiek sie czymsi umorduje, to spamiynto tóm strate energije do kóńca swojigo żywobycio i na podrugi uż sie bydzie miarkowoł, coby se w niczym nie ubliżyć.

Mini słownik:

wieca - rzeczy, fórt - wciąż, stawio - buduje, banhof - dworzec, cug - pociąg, damfula - lokomotywa, sztreka - tory, sztróm - prąd, ustrzignóć - uciąć, podziwo - popatrzy, kansi - gdzieś, nónść - znaleźć, ganc - całkiem, nieskorzij - później, spadki - z powrotem, żywobyci - życiorys, ubliżyć - zaszkodzić.

Tóż miyjcie sie wszedcy dobrze i wiesiołego popióntku

Komentarze: (0)    Zobacz opinię czytelników (0)    Dodaj opinie
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.

Dodaj komentarz

Zawartość pola nie będzie udostępniana publicznie.
  • Adresy internetowe są automatycznie zamieniane w odnośniki, które można kliknąć.
  • Dozwolone znaczniki HTML: <em> <strong> <cite> <code> <ul> <ol> <li> <dl> <dt> <dd>
  • Znaki końca linii i akapitu dodawane są automatycznie.

Więcej informacji na temat formatowania

Image CAPTCHA
Wpisz znaki widoczne na obrazku.
reklama
reklama