CO TYDZIYŃ PO NASZYMU: Ździorba, charapuci i hoba o sóm wiece, kiere dycki godziły sie yno do wyciepanio

”...rozmajte hoba...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Rozmajte hoba

Zeszłóm niedzielem na rynku w Cieszynie, szło se kupić rozmajte hoba, charapuci, abo aji też inksze ździorba, kiere normalnie żodyn nie potrzebuje. Taki zwyk przedowanio tego, co uż na nic nima, nie wiym skónd do nas prziszeł, bo przeca jak tak człowiek podropie sie dobrze po czepani, to se zaroz wszymnie, że szkoda na to grosza. Znóndóm sie dycki tacy, co majóm za moc piniyndzy i aji tacy co potrzebujóm postawić taki ździorbo na szranku i dziwać sie, kiedy to muchy obesrajóm. Mómy w Cieszynie każdy tydziyń we strzode i w sobotem torg, na kierym yno przedowane sóm nowe wieca i żodyn eszcze nie prziszeł na to, coby tam wciskać tustelokóm aji inksze charapuci. Byłoby to bez żodnej łostudy, bo stojóm tam na tym placu uż gotowe budy s daszkami, ale isto miastowe urzyndniki, kozali by se za to powolyni piekny grosz zapłacić. Dycki jednakowóż to je tak, że ci, co chcóm sie pozbyć rozmajtego starego charapucio nie smerdzóm groszym. Eszcze ze trzicet roków tymu żodyn starych wiecy nie przedowoł, bo fórt były przidajne, a jak cosi krzapło, to dycki nieskorzij było to sprawowane. Jak uż to sie jednakowóż na nic nie godziło, a było to drzewiane, to ludzie roz dwa chynyli to pod blache, a jak to było zieleźne, to wartko na tragaczu, abo na karach zasmyczyli to do kszeftu, kiery skupowoł zielazo. Dzisio aji ganc dobre wieca, kiere eszcze fungujóm ludzie prugujóm przedać, bo uwidzieli we kszefcie jakisi moderniejsze, a sómsiod uż taki mo. Rozchodzi sie ło to, że zowiść poradzi gnać s ludziami, tam kaj normanie nigdy by nie zaszli, a ku tymu poradzi im wypucować do czysta szrajtofle.

Mini słownik: hobo-niepotrzebna rzecz, charapuci- zepsute rzeczy, ździorba- nieprzydatne rzeczy, czepań- głowa, wszymnie-wpadnie na pomysł, dycki-zawsze, strzoda-środa, wieca-rzeczy, łostuda-kłopot, buda-stragan, fórt-ciągle, krzapło-złamało się, nieskorzij-później, pod blache-pod piec, chynóć-rzucić, kszeft –sklep, tragacz-taczki bez skrzyni, kary- taczki, ganc- całkiem, kaj-gdzie, szrajtofla-portmonetka

Tóż miyjcie sie wszedcy dobrze i wiesiołego popióntku