CO TYDZIYŃ PO NASZYMU: Dzisio auto tustelocy majóm yno na pokozbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Wszecko dzisio mómy insze i je to procne, coby do tego prziwyknóć. Aji by sie zdało, że taki przeglóndniyńci auta do delszej jazdy po publicznych cestach zaczli robić ganc inakszyj. Uż sie teraz s auta nie wylazuje, bo nie wiadómo czy sie do nich nie przijechało s korónóm na czepóni. Siedzi sie w postrzodku i przszłapuje na ty pedajle na kiere rozokorze diagnosta. Nie uwierzicie, ale idzie to tak wartko, żech ani bardzo dwa razy nie wydychnył, a użech był fertig. Widać s tego, że kiejsi zogłóndali tam kaj nie musieli, a dzisio dyrbióm yno tym co naprowde trzeja. Trwało to bezmała kolem piyńci minut do kupy s płacynim. Jo by to zarachowoł jako rekord Guinnessa i trzeja by sie było tym pochwolić, bo to dycki cosi takigo nagno klijyntów. Chocioż s drugi stróny to łóni majóm i tak moc szczynścio, że żodyn ich s roboty nie wyciepie, bo każdy co mo aucisko, roz do roka musi ich nawszczywić i niechać im stówke. Je to zaplanowwae łodziyrani ludzi s piniyndzy, bo przeca jak gdo dzierży swoji auto dóma i nim nie jeździ po cestach, to czy łóno mo rozlajerowany przodek, czy mu lampa nie świyci, to przeca żodnymu to nie wadzi. Jo też mało dzisio skyrs tego koronowirusa jeżdżym, bo dlo zdrowio lepszyj sie je przynś pieszki, chocioż by skyrs tego, coby cosi zaimawego uwidzieć. A zaimawe sóm ty drzewiane corki, kiere rotuzowi postawli na rynku. Kapke to dłógo trwało coby prziś na to, żeby ty betónowe kryngi s kwiotkami jakosi upiynkszyć, ale jak to ludzie prawióm lepszyj nieskorzij niż wcale. Teraz yno za fest tych kwiotków i strómków nie podlywać, coby wartko nie rosły i korzyniami nie roztargały tych betónów. Mini słownik: procne - trudne, prziwyknóć - przyzwyczaić, cesta - droga, ganc - całkiem, czepóń - głowa, postrzodek - środek, prziszłapuje - przydeptuje, wartko - szybko, fertig - gotowe, kaj - gdzie, dyrbać - potrząsać, bezmała - podobno, dycki - zawsze, wyciepie - wyrzuci, nawszczywić - odwiedzić, niechać - zostawić, rozlajerowany - zużyty, skyrs - z powodu, zaimawe - ciekawe, corek - ogrodzenie z desek, kapke - trochę, prziś na to - wpaść na pomysł, prawić - mówić, nieskorzij - później, fest - mocno, strómek - drzewko. Tóż mjyjcie sie wszedcy dobrze i wiesiołego popióntku
|
reklama
|
Dodaj komentarz