CO TYDZIYŃ PO NASZYMU: Skapnie pore groszy

"...s przodku je taki mały mostek...". fot. FJD

"...przewiyś na kajaku...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Skapnie pore groszy

I tak my doszli do Błogocic kiere dzisio sóm na kóńcu Cieszyna. Eszcze sie podziwómy na tyn pieknie wyrychtowany Camping "Olza" i uż sie trzeja bydzie zwyrtnóć spadki. Nie powiym, wcale łón nima po wyrchu szpatny i myślym se, że aji w postrzodku też mu nic nie chybio. Nejbardziyj isto chybio tymu campingowi letnikorzi, kierzi mieli tu niechować swoji pinióndze i cosi sie dokłodać do kasy miasta. Je przeca uż ciepło a jo tam widzioł w postrzodku jyno jedno auto i nic wiyncyj sie tam nie ruszało. Możne, że w popióntek Cieszyniocy tam przichodzóm s dzieckami coby ich przewiyś na kajaku abo wedla na szportplacu zagrać se w sito. Se siednóć s wiynkszóm pakóm tam nima kaj,bo tak kierysi to dziwoko zaprojektowoł a potym wystawił, że yno do postrzodka patnos ludzi wlezie. Zaś wiynkszo izba na sztyrycet ludzi je kapke dalij przi chaźlach, ale do ni trzeja by było nosić jedzyni przez cestem i żodyn Sanepid sie na to nie zgodzi. I u zaś zustały bolawie obsztelowane nasze pinióndze i żodyn sie dzisio isto do tego nie przizno, bo to uż je taki nasz polski zwyk. Możne, że eszcze cosi nieskorzij ło nich napiszym jak sie zwiedzym jako im to tak naprowde funguje. Nejważniejsze, że je tam kaj s autym stanóć, bo na to żodym placu nie żałowoł. Zaroz s przodku je tam taki mały mostek pod kierym fórt giszy woda, kiero ciecze s tego kajakowego stawu i jejo enrgija sie marnuje. Teraz mómy taki czasy i mode na ekologicznóm energije i nie wiym czy nie byłoby dobre s tóm wodóm zrobić porzóndek i chytać jóm na małej sztrómowj turbinie. Możne, że jak to kierysi poczyto to tak zrobi a mje za tyn sztrómowy napad skapnie pore groszy.

Mini słownik:

podziwómy - popatrzymy,

zwyrtnóć - obrócić,

szpatny - brzydki,

chybio - brakuje,

letnikorz - wczasowicz,

popióntek - koniec tygodnia,

dziecka - dzieci,

sztyrycet - czterdzieści,

wedla - obok,

wystawił - wybudował,

chaziel - toaleta,

nieskorzij - później,

giszy - wylewa się,

sztróm - prąd.

Miyjcie sie wszedcy dobrze i wiesiołego popióntku!

Dzisiejszy tekst ma tytuł Skapnie pore groszy