CO TYDZIYŃ PO NASZYMU: Byłby uż czas, coby szło dostać taki szaty, kiere hrubnóm razym s paniczkami

...mo miano XXL...

...kiery mo miano"Cloe"...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Fórt szkryfajóm

Na Głymboki wedla tego "Krokodyla", pod nomerym dwija trzicet /32/, paniczki kiere nabrały ciała cylnóm na szaty, kiere na zicher sie im przipasujóm. Dzisio, coby żodnego nie nasrować, że stłósnył, to sie mu prawi, że uż mo miare XXL, bo to je jakisikej lekciejsze dlo ucha. Tóż też isto tymu, tyn kszeft mo miano "XXL",ale coby tustelocy zachycili czym sie tam tak naprowde kszefci, je tam pod nim tabulka, na kierej pisze odzież. Wedla na murze wisi wielko bioło tabula, s kierej sie paniczki mogóm wywiedzieć co trzeja zrobić, coby sie wszedcy chłopi za nimi oglóndali, a kamratki zowiściły im urody. To poprawiani urody snaszło se tam swój plac na piyrszym piyntrze i mianuje sie "Atelier Stylu", bo isto uż wszedcy w naszym mieście wiedzóm, że miano atelier nie patrzi sie yno artystóm, ale każdymu, kiery se to na szyldzie napisze. Kónsek dalij idzie trefić na kszeft s telefónami, kiere dzisio nie wiadómo czymu nazywomy komórkami. Za ausagóm idzie poczytać ło tym, że jak mómy na zbyciu jakisi telefon, to mogymy go tam u nich niechać i kupić se inkszy możne aji taki, kiery też tam je przez kogosi niechany na przedój. Meter dalij je przileżytoś wlyś w ulice Kuminiarskóm, na kóńcu kierej ciepnie sie nóm na łoczy nasz cieszyński tyjater. Dziynnie ku wieczoru je tam tak cima, że rozmajte kluki fórt szkryfajóm po murze, a nasi miastowi wachtyrze nie poradzóm ich chycić. Dwiyrze dalij trefiymy na kszeft, kiery mo miano "Cloe", ale niech sie żodyn nie raduje, że wartko przidzie na to co to je, bo w wikipedyji roz pisze, że je to zielóny flancek,a po drugi, że je to młodo dziełucha. Dycki lepszej sie jednakowóż podziwać na auslage, coby uwidzieć czym łóni kszefcóm.

Mini slownik:
wedla-obok,
cylnóm-trafią,
nasrować-denerwować,
kszeft-sklep,
kamratki-koleżanki,
mianuje się-nazywa się,
niechany-zostawiony,
auslaga-wystawa,
przieżytoś- okazja,
wachtyrz-strażnik,
flancek-rozsada,
dycki- zawsze,

Tóż miyjcie sie wszedcy dobrze i wiesiołego popióntku.