CO TYDZIYŃ PO NASZYMU: Kiejsi żodyn sie wartko ze swojigo kwartyru nie wykludzoł

...nomer sztyrycet sztyry...

...nomer pińdziesiónt sztyry...

...postawili jóm we winklu...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

We Winklu
Jak człowiek tak pomaluśku szpacyruje, abo sie plyncie i drepsi po tretuarze, to nikiedy trefi na znómych, abo na takich co radzi czytajóm tóm naszóm rzecz po naszymu.Niedowno potkołech takóm szykownóm paniczke, kiero mi prawiła, żech za mało napisoł ło taki jednej pieknej chałupie w kierej kiejsi miyszkała. Je to yny jedna tako chałupa w Cieszynie kiero mo dwa nomera, skyrs tego, bo postawili jóm we winklu na dwóch ulicach. Jedyn nomer sztyrycet sztyry mo przi Głymboki, a drugi nomer pińdziesiónt sztyry przi Menniczej. Ta paniczka była tako szykowno i łopwiedziała mi ło tym, jako to pón Józef Brzóska tata łod jeji starzika kupił tóm chałupe w roku 1922 . Założył w ni kszeft kolónialny w kierym do roku 1930 przedowała jejo starka Anna razym ze swojóm siostróm Marysióm. Przedowały tam rozmajte wieca delikatesowe a przi tym kwit i likiery poskludzane s całego świata. Dziynka tymu, że ta chałupa była tako wielko to kołami też tam kszefcił pón Schmidt ,a masorz Balcarek handlowoł wszelijakim miynsym i na zicher była łowiynzina i miynso s babucia, a możne też aji rozmajto chabanina. Po wojnie jak prziszeł socjalizm i wszecko było nasze abo jako to nikierzi prawióm niczyji to PSS odewrził tam kszeft s kwitym, a nieskorzij kszeft do dziecek, dziełuch i kluków, kiery mianowoł sie “Nastolatek”.Kiejsi tustelocy żyli w tych samych chałupach dłógi roki i żodyn sie ś nich nie wykludzoł, bo w Cieszynie było doś roboty. Tóż też tymu ta paniczka dobrze pamiynto swojóm starke Annę i starzika Andrzeja, kierzi hańdownij w tej pieknej chałupie miyszkali, a dzisio mo tam kwartyr jeji tata.

Mini słownik:
drepsi-depce,
naszóm rzecz-naszą mowę,
kiejsi-kiedyś,
starzik-dziadek,
kszeft-sklep,
wieca-rzeczy,
kwit-wódka,
koło-rower,
masorz-rzeźnik,
kluk-chłopiec,
wykludzać-wyprwadzać się,
starka-babcia,
kwatyr-mieszkanie,
chabanina-odpady mięsa.

Toż miyjcie sie wszedcy dobrze i wiesiołego popióntku