CO TYDZIYŃ PO NASZYMU: Fórt każdej paniczce sie zdo ,że w zagramanicznej oblyczce je piekniejszo

...je kszeft s bótkami...

... agyncyja turystyczno...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Drepsić do wyrchu
Dzisio zaś bydymy drepsić ulicóm Głymbokóm do wyrchu i obezdrzymy kszeft, co sie usadził we winklu s ulicóm Menniczóm pod nomerym sztyrycet sztyry. Niech se żodyn nie myśli, że tyn kszeft mo polski szyld, bo przeca to isto dlo nich by była wielko gańba. To jejich miano, kiere pisze sie"taboo" też nie idzie nónś w żodnej encyklopedyji, bo isto tak jak inksze je zmyślóne, bo na świecie tak sie przeca nic nie nazywo. Skónd sie u ludzi bieróm taki napady skyrs tych kszeftowych mian tego nie wiym, ale możne rozchodzi sie ło, coby paniczki mógły jedna przed drugóm sie pochwolić zagramanicznóm oblyczkóm. Przez auzlagi, kierych tyn kszef mo aże piyńć widać yno same babski szaty i po tym idzie poznać czym sie tam w postrzodku kszefci. W tym pyndzie przepółnioł bych cosi napisać o sklepie, kiery kszefci bótkami i mo plac przed tym "taboo". Możne, że to przepómniyni stało sie tymu, bo tyn kszeft mo normalny szyld na kierym pisze "Obuwie" i isto skyrs tego nie ciepnył mi sie na łoczy. Zaimawo je yno ta kartka za auslagóm, na kierej pisze, że przedujóm tam bótki s polski skóry, ale przepómnieli napisać jaki zwiyrz ś ni zustoł odrzity. Kiejsi ta piekno chałupa była łod szefca Wlhelma Bergera i możne skyrs tej tradycyji tyn kszeft s bótkami sie tam znaszeł, coby tymu panoczkowi co uż isto downo je w niebie sie przipodobać. Jak przehópnymy przez Menniczóm to zaroz na winklu je kszeft s bótkimi do kupy s rozmajtymi taszkami. Kapke dalij je agencyja turystyczno, kiero mo za auslagóm przeszło dziesiyńć plakatów, kiere namowiajóm nas coby se u nich wybrać rajze na dobry łorlap.

Mini słownik:
drepsić-spacerować,
obezdrzymy- oglądniemy,
kszeft-sklep,
gańba-wstyd,
napad-pomysł,
paniczka-kobieta,
oblyczka-ubiór,
szaty-sukienka,
kszefci-handluje,
auslaga- wystawa,
odrzity-obdarty,
skyrs-z powodu,
isto-pewnie,
przehópnóć-przeskoczyć,
kapke- trochę,

Tóż miyjcie sie wszedcy dobrze i wiesiołego popióntku