CO TYDZIYŃ PO NASZYMU: Kiejsi zicherki i szpyndliki wszecki paniczki miały na pozoryndziu

...mały kszeft s obrusami...

...eszcze miynszy sklep Pasmanteria...

...sztyry wielki litery EVEN...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Kiery sie strupi

Dzisio sóm my dalij na Głymboki, coby jednych kszefciorzy zganić, a drugich pochwolić. Bo jednych i drugich je tam jednakowo moc i nie wiedzieć przi kierych sie delij zadzierżeć. Pochwolić by sie dzisio patrziło za te pieknóm auslage kszeft “Drobiazg” pod nomerym trzicet osim, kiery sie strupi, że przeduje nejłacniejsze wieca w Cieszynie. Jako prziszli ku tak pieknym dwiyrzóm i ku wystruganym drzewianym kwiotkóm tego nie wiym, ale isto wszecki kszefty w Cieszynie im tego zowiszczóm. Za ausagami, a majom ich aże dwie, idzie uwidzieć wszelijaki wieca, kiere tusteloki kupujóm yno skyrs tego, że sóm łacne i pieknie wyglóndajóm. Za jednóm auslagóm idzie też uwidzieć moderne w całej Europie taki trzi koliczka, kiere dziecka naździywajóm se na palce i robi im to uciechę jak zwyrtajóm nimi całymi godzinami. Konsek dalij idzie trefć na taki mały kszeft s serwetami, cychami i płachtami w kierym poradzymy też se kupić ryncznik i hadry do uciyranio gorków. A dwiyrze dalij je eszcze mjynszy sklep “Pasmateria” w kierym kszefci sie s, jegłami, szpyndlikami, zicherkami i eszcze inkszymi wiecami, bez kierych szwoczki ni mogóm sie obynś. Jak pokroczymy kapke dalij to trefiymy na ausage za kieróm wiszóm sztyry kartki na kierych je wyoślóne kaj łóni sie wykludzili i że dalij kszefcóm tymi samymi wiecami. Przepómnieli jednakowóż ściepać i zebrać ze sobóm taki sztyry wielki litery EVEN, kiere nie wiym ku czymu by przirazić. Bo po angielsku tym słowym idzie aże sztyry wieca zmianować i skyrs tego nie wiym, co razinko tak naprowde w tym kszefcie kiejsi sie przedowało.

Mini słownik:
zadzierżeć-zatrzymać,
patrziło-należało,
kszeft-sklep,
sie strupi- się chwali,
wieca-rzeczy,
zwiszczóm-zazdroszczą,
skyrs-z powodu,
łacne-tanie,
naździywajóm-nawlekają,
zwyrtajóm- kręcą,
knefle-guziki,
szpyndlik-szpilka,
zicherka-agrafka,
szwoczka-krawcowa,
auslaga-wystawa,
wykludzili-wyprowadzili,
ściepać-zrzucić,
przirazić- przyczepić,
zmianować-nazwać

Tóż miyjcie sie wszedcy dobrze i wiesiołego popióntku