CO TYDZIYŃ PO NASZYMU: Zwyrto sie fórtbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" I u zaś jak łońskigo roku trzeja bydzie wszecko zacznóć łod nowa, bo ni ma smiłuj sie, jak wszecko żynie do przodku. Ta nasza ziym, zwyrto sie fórt tak samo i dziynka tymu dycki ło tym samym czasie przichodzi do nas nowy rok. Kiejsi w taki nowy rok było na cestach pełno zomiyntów, a nikiere sióngły aże pod parze. Dzisio tego śniega ni ma ani kapki i jakosi je nóm za nim luto. Wszedcy uż wiedzóm, skyrs czymu tak je, ale nic s tym nie robóm, bo hajcować pod blachóm przeca czymsi trzeja. Na mieście w Sylwestra też jakosi nie było wiesioło, bo wszedcy eszcze na przedbiyżki chcieli udać łostatni grosz. Ty biołe budy na rynku były pozawiyrane i żodyn sie kolem nich nie plyntoł. Aji gołymbie kansi pouciekały, bo łóne wiedzóm, że jak na rynku żodnego ni ma, to nie bydzie do czego dziubnóć. Za to kolem tego nowego banhofu ludzi było jak mrowców i nie szło bardzo ani przynś na drugóm strónem cesty. Piyrsze sie isto też trefiło tymu pargingowi pod “Stelóm”, bo był durch pełny i rożnióne było światło VOLL. Ni ma to pieknie, że to ni ma napisane po naszymu, bo jak uż kierysi prziszeł na to, że ta cało galeryja mo miano “STELA” to aji insze szyldy majóm być po naszymu. Ku wieczoru uż ganc ucichło, bo kszefty zustały doś wartko pozawiyrane, a tustelocy rychtowali sie na rozmajte hałdamasze. Pytka była dlo wszeckich, coby ło pólnocy nie strzylali petardami, ale żodyn se tego nie broł do siebie i uż robili krawal porem godzin przed dwanostóm. Boroki dycki sóm ty psy i kocury, kiere podobno słyszóm porem razy lepszyj łod nas. Kiedy ludzie przidóm na to, że to strzylani je na guwno, bo tyn dziyń w nowy rok je ganc taki sóm, jaki były łóńskigo roku, a we czwortek i tak muszóm iś do roboty, coby porem groszy zarobić. Mini słownik: łóńskigo - zeszłego, wszecko - wszystko, żynie - gna, zwyrto - kręci się, fórt - ciągle, dycki - zawsze, cesta - droga, zomiynt - zaspa, kapke - trochę, luto - przykro, skyrs - z powodu, hajcować - grzać, przedbiyżki - wyścigi, budy - stragany, pozawiyrane - pozamykane, kansi - gdzieś, banhof - dworzec, mrowce - mrówki, durch - całkiem, rożnióne - zapalone, kierysi - ktoś, prziszeł na to - wpadł na pomysł, szyld - tablica informacyjna, hałdamasz - zabawa, pytka - prośba, krawal - harmider, boroki - nieszczęśnicy, rychlij - szybciej. Mjyjcie sie wszedcy dobrze i wiesiołego popióntku.
|
reklama
|
Dodaj komentarz