CO TYDZIYŃ PO NASZYMU: S wielkim strómkym je dycki ostuda, bo trzeja na niego przirazić moc baniek

Idzie zima i tak jak hańdownij isto też bydzie zima na polu. Skyrczóne gołymbie siedzóm wedla "Floryjana" i nic se s tego nie robióm, bo murek łod lata je isto eszcze kapke zagrzoty i nie łoziómbie ich to po nogach. Wody uż doś dłógo we Floryjanie ni ma i łóne ś nióm majóm kapke łostudy, bo jak nie padze to aji kałuże sóm prózne. W lecie to tustelocy dowajóm wodem do rozmajtych kastrolków, coby psy i kocury se mógły czegosi mołoś niewiela do wola szluchnóć. Gołymbie na rynku to ni ma nejważniejszo atrakcyja, bo przeca tyn prowdziwy strómek ich przedbiygnył. Je na prowde prowdziwny, bo isto se kansi rychlij rosnył w lesie. Tustelocy prawióm, że była wielko łostuda s przismyczynim go do Cieszyna, bo isto był za wielki i dwa razy zgruszoł na ziym, jak jacysi macherzi jechali ś nim ku Cieszynu. Roz kansi na tej szyroki ceście, kiero idzie ku Biylsku, a po drugi uż w samym mieście na cestowym kolcu wedla "Steli". Skyrs tego je kapke łodrzity i s jednej strony nie wyglóndo za pieknie, ale możne tym naszym gołymbióm to nie bydzie zawadzać, bo se wychladajóm nieprasknióny kónor, na kierym se siednóm. Mogóm se też spocznóć na tych biołych budach, kiere stojóm na rynku i zacznóć ich "prziłozdobiać", a majóm i poradzóm czym. Floryjan telkowne roki to zdzierżoł, to ty budy isto też to udźwignóm, bo w zimie jak mało jedzóm, to tych kurzińów ni ma wiela. A ty budy bydóm zaroz kapke piekniejsze, bo taki cosi ganc biołe nie ciepie sie ludzióm na łoczy, a rozchdzi sie przeca ło to, coby sie przi ni zastawić i wypróżnić swojóm szrajtofle.

Mini słownik: hańdwnij - kiedyś, zima - zimno, skyrczóne - pokurczone, kapke - trochę, łostuda - kłopot, padze - pada, kastrolek - rondelek, szluchóć - napić się, strómek - drzewko, przedbiygnóć - wyprzedzić, rychlij - wcześniej, cestwe kolco - rondo, buda - stragan, cesta - droga, wychladajóm - wyszukają, łodrzito - obdarta, poradzóm - potrafią, telkowne - wiele, kurzińce - odchody, ganc - całkiem, szrajtofla - portmonetka.

Mjyjcie sie wszedcy dobrze i wiesiołego popióntku.