CO TYDZIYŃ PO NASZYMU: Noworoczny winsz 2019być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Tak w łostatnim tydniu każdego roku, a jak przepómnieli to aji zaroz w piyrszym tydniu po nowym roku tustelocy i nasi gorole tak se winszowali na NOWY ROK. Na szczynści na zdrowi na tyn Nowy Rok, żeby sie wóm darziło, mnorziło kapusta i groch, żeby wóm sie darziło mnożiło we dworze i w kumorze, na kołeczku i we woreczku, w każdym kóntku po dziesióntku. Dej Boże co byście mieli tela wołków, co w płocie kołków, tela cieliczek co w lesie jedliczek, tela byczków co lesie buczków, tela owiec co w lesie mrowiec, a w polu coby stoł snop przi snopie, a gazda miyndzy kopami jako miesiónc miyndzy gwiozdami i żeby jechoł wóz za wozym do gumna jak pszczoły do ula i żebyście byli tacy weseli jako w niebie anieli. Żeby sie wóm wszecki dziywki powyzdowaly, a pachołcy pożynili, a mie połaźiczka na wiesieli zaprosili. Prziszełech tu po trójniczek, trójniczek mi dejcie zy mie sie nie śmiyjcie, bo tu s wozym nie pojadym, suchej rzepy nie powiezym, a co mi docie to weznym-grosz abo dwa to je moja kolynda. Winszujym wóm szczynścio zdrowio na tyn Nowy Rok, a ni yno na tyn Nowy Rok, ale na delsze czasy, abyście byli weseli jako w niebie anieli, aby sie wóm mnorziło darziło, abyście mieli zimioki jak chodoki, kapustem jak pnioki, bób jak żłób, żytko i proso i cobyście nie chodzili boso. A jo winszujym wszeckim tustelokóm, żeber zdrowio i miech szczynścio, kiery mo być wielki jak smrek s Wisełki. I co by sie wóm wszecko cały prziszły rok podarziło, a w kapsach piniyndzy sie wóm namnorziło. Mini słownik: winsz - życzenie, jedliczka - jodełka, buczek - mały buk, mrowiec - mrówka, gumno - klepisko w stodole, połaźnik - składający życzenia, trójniczek - trzy grosze, smrek - świerk, żber - duże naczynie drewniane. Tóż miyjcie sie wszedcy dobrze i wiesiołego 2019 Nowego Roku!
|
reklama
|
|||||||||||||||
|
Dodaj komentarz