Przi niedzieliczce coby nie zapómnieć naszej rzeczy: Nie worce lyczyć

"przichodnie to dzisio robióm za takóm modernóm poczte...". fot. FJD

"swoj kszeft odewrzili insi dochtorzi...". fot. FJD

Dzisio Wóm zaś poczytóm po naszymu opowiadanie "Między niebym a ziymiąi", Adama Wawrosza z książki "Z Adamowej dzichty". fot. ARC SPOT

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Nie worce lyczyć

To wielki Centrum Medyczne co my łostatnio spozdrzili chciało by isto być małym szpitolkym ale sie im to nie podarzi bo by musieli mieć odewrzite aji w nocy. Lepszyj ni mieć s chorymi za moc łostudy i caluśkóm chybe na zdrowiu szrajbnóć na kartce i posłać chorego do szpitola. Krwie ani inszych ludzkich wiecy jak dejmy na to jscochów też wóm tam nie zbadajóm, bo lepszyj to kansi dalij posłać do labolatoryje i sie s tym nie łostudzić. Dzisio ty wszecki przichodnie to raczyj robióm za takóm modernóm poczte, bo zamias listów to ludzi dalij posyłajóm i sie ś nimi dłógo nie kłopocóm. Kiejsi dochtorzi mieli miesiynczny płat i mieli czas wszecko pomaluśku na zicher zbadać, a dzisio rachuje sie yno wiela,wiela i eszcze roz wiela tych chorych przez tyn gabinet każdy dochtór przepuści. Młodziocy se myślóm,że całe życi bydóm zdrowi i nejraczyj by ty chore starki i starzików nie lyczyli, ale yno pozawiyrali ich w dómach starcow i czakali aż sie tam pominóm. Fórt przeca idzie słyszeć, że tego czy tam tego uż nie worce lyczyć bo to je za drogi a pinióndze lepszyj dać na wyproszczyni krziwego nosa, obstrzigani kłapatych uszy abo powiynkszyni tego co baby noszóm w lajbikach. Dzisio yno rachuje sie to co widać po wyrchu i to co na człowiecze je obleczóne, tóż też tymu ludzie wolóm dać pinióndze na wybiglowaniu fołdów s gezichtu niż na wypolyni plynskiyrza na piyńcie. Zaroz wedla tego medycznego urzyndu pocztowego swój kszeft odewrzili insi dochorzi, kierzi jak se myślym wylyczóm was s tego co majóm napisane na szyldach. Jedyn ś nich zozdrzi wóm do uszy a drugi do gymby coby móg powiedzieć wiela was bydzie kosztowało to niechodzyni do niego przez pore łostatnich roków.

Mini słownik:

spozdrzili - zobaczyli,

podarzi - uda się,

odewrzite - otwarte,

łostuda - kłopot,

chyba - wada,

szrajbnóć - napisać,

jscochy - mocz,

kansi - gdzieś,

łostuda - kłopot,

miesiynczny płat - stała pensja,

zicher - dokładnie,

starka/starzyk - babcia/dziadek,

wybiglować - wyprasować,

pominąć się - umrzeć,

yno - tylko,

obleczóne - ubrane,

worce - opłaca się,

kszeft - biznes,

szyld - tablica informacyjna,

bachórz - brzuch,

plynskiyrz - odcisk,

zozdrzi/on,ona,ono/ - zobaczy.

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Między niebym a ziymią", Adama Wawrosza z książki "Z Adamowej dzichty".