Przi niedzieliczce coby nie zapómnieć naszej rzeczy: Dobrze je mieć w podstólku jedzyniowe norychta

"...postawili wielki plech...". fot. FJD

"...kiery sie mianuje FENIKS K&W...". fot. FJD

Dzisio Wóm zaś poczytóm po naszymu opowiadanie "Godnie żyć", Zbigniewa Niemca z książki "Kaj idziesz człowiecze".

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Łykatóm owiynzine

I tak my sie naszli przi downym “Polwidzie”, kiery jak insze werki w Cieszynie uż downo zutoł zawrzity. Telkowne roki wyrobiali tam ty jedzyniowe norychta i wszeckim sie to godziło aż naroz prziszeł taki czas, że łyżki sie stały za małe, mesery nie nabruszóne a widełki nie szło wbić ani do uwarzónego zimioka. Isto też zaczyły ty norychta rdzowieć i skyrs tego jakisi móndroki zakozały to dalij tam wyrobiać i zawrziły tyn werk. Ludzie eszcze isto majóm po chałupach jejich jedzyniowe norychta i wszymóm se, że jak przi swaczynie abo przi łobiedzie nabiyrajóm zupy abo rzarzóm łykatóm owiynzine, to spominajóm se na tego kiery im to po znómości s tego Polwidu dolifrowoł. Ni mogym se spómnieć co bych nie widziół u mojich znómych tego polwidowego sprzyntu. Przeca teklowne roki co tyn werk egzystowoł było doś czasu coby każdy Cieszyniok mioł w podstólku kapke łyżek, noży i możne aji widelców s tego naszego Polwidu. Kiejsi przeca mało co sie kupowało jyno wszedcy fórt cosi lifrowali, załatwiali abo organizowali. Jak sie tak rozglóndniecie po inszych landach to nie idzie tego naszego słowa “załatwić” przetłumaczyć na inszóm europejskóm mowe. Całe szczynści, że jejich starych hal eszcze nie obalili jak dejmy na to zrobili to s Cefanóm i dzisio sie kierysi wziył za przerobiani tego na kwartyry. Nie idzie mu to wartko, bo isto chybiło piniyndzy i uż z rok to poniechoł, a do dzisia ani tego nie opucowoł. Kszeft ze staróm oblyczkóm kiery tam łostnio egzystowoł musioł sie wykludzić, ale coby ludzie nie chladali tego po całym Cieszynie to za płotym postawiłi wielki plech na kierym je wyoślóne kaj ich nalyś. Bramke dalij je zaś jakisi kszeft, kiery sie mianuje FENIKS K&W i jesi gdo wiy co tam przedujóm abo wyrobiajóm niech mi napisze.

Mini słownik:

naszli - znaleźli,

werk - zakład,

zawrzity - zamknięty,

telkowne roki - długie lata,

jedzyniowe norychta - narzędzia do jedzenia,

meser - nóż,

nabrusić - naostrzyć,

skyrs - z powodu,

wszymać - domyślać się,

swaczyna - śniadanie,

rzazać - rżnąć,

łykate - żylaste,

owiynzina - wołowina,

dolifrować - dostarczyć,

podstólek - szuflada,

fórt - ciągle,

kwartyr - mieszkanie,

obalić - przewrócić,

wykludzić - wyprowadzić się,

opucować - otynkować,

chladać - szukać,

plech - blacha,

wyoślić - wytłumaczyć,

kaj - gdzie.

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Godnie żyć", Zbigniewa Niemca z książki "Kaj idziesz człowiecze".