“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Granitowe winkle
Zaczynóm być kapkem wylynkany skyrs tego, ło czym bydym dalij pisoł jak ta naszo Głymboko zustanie jak sie patrzi naroz wyrychtowano. Bo na dzisio wszecko to wygłóndo jakosi mizernie i je coroz mjynij nadzieji, że to sie podarzi chocioż tego roku prziś s tym do porzóndku. Uż porem miesiyncy tymu chybiło tym macheróm tej czyrwiónej bazaltowej kostki i trzeja jóm było s ulice Solnej wytargać. Dzisio na łoko widać, że isto zaś chybi tej kostki, bo ta mizerno kupka kieróm tam idzie uwidzieć styknie nejwyżyj na porem metrów cesty. Wedla Starego Torgu idzie też uwidzieć przogrómnie wielkóm dziure, kieróm coby jakimsi skolim zasuć, trzeja bydzie do tego napytać porem wywrotek. Na tej uż zrychtowanej połówce Glymboki, kaj na chodniku je porem schódków, podarzilo sie kómósi mieć taki napad, kiery je wort pochwolynio. Rozchodzi sie ło to, że nie trzeja bydzie dźwigać po schódkach wózków s dzieckami, bo uż na nich sóm poukłodane szpecyjalne granitowe winkle. Kierysi uż kiejsi ło tym pisoł, że to zustało przepómniane, coby po tych schódkach szło po leku tam a haw jechać z wózkym. S tego widać, że czasym worce cosi móndrego kómósi rzeknóć , bo przeca żodyn ni mo wszeckich móndrości we swoji czepóni. Rotuzowi uż downo tymu rzekli, że na Głymboki nie pudzie ani stoć ani gzuć żodnym autym i skyrs tego jak widać nikierzi uż majóm taki napad coby swoji auciska stawiać na moście. Skyrs czymu miastowi wachtyrze tych szoferów nie przeganiajóm tego nie wiym, ale isto je ich za mało i nie poradzom wszyndzi naroz być.
Mini słownik gwary cieszyńskiej:
kapkem - trochę, wylynkany - wystraszony, jak sie patrzi - jak należy, zrychtowano - naprawiona, sie to podarzi - to się uda, macher - specjalista, wytargać - wyrwać, zaś chybi - znowu zabraknie, cesta - droga, skoli - kamienie, napytać - namówić, taki napad - taki pomysł, winkle - trójkąty, gzuć - pędzć, tam a haw - tam i z powrotem, czepóń - głowa, rzekli - powiedzieli, skyrs tego - z tego powodu, miastowi wachtyrze - straż miejska, ale isto - ale zapewne.
Tóż miyjcie sie wszedcy dobrze i wiesiołego popióntku!
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz