CO TYDZIYŃ PO NASZYMU: Nadsztiklować wszecko idzie

"...nie wlazło im to na postawióny płot...". fot. FJD

”...chwolidło łod jakigosi Moskały...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Drzewiane chałupy

Kierysi mi napisoł, że se woli dóma zagrzoć postrzodek, bo farorz w Krasnej grzje jejich kościół i po sumie je mu aji w potrzodku ciepło. Myślym se, że je to ganc szprytne, bo po co dować dwa razy pinióndze na to samo. Zdrowsze je przeca cosi chynóć do koszyczka, a te staroś grzocio w kościele niechać farorzowi. Zdrowi parafijanie, kierzi nie krzipióm i ni majóm żodnej rymy przidóm na zicher zaś za tydziyń do kościoła i cosi chynóm na tacke. Jakby tego nie kalkulyrować to hajcowani w kościołach wyndzie wszeckim na dobre, bo w zimie aji nejbardziyj zmarzli przidóm sie farorzowi pokzać na łóczy. Kapke dalij w taki zielónkawej chałupie znaszło se miejsce pore kszeftów, kiere zawiesiły swoji chwolidła na ścianach i aji na płocie. Je tam firma ”Mój Dom”, kiero rozmyślo jako by tu namowiać cieszynioków, coby se stawiali chałupy ze samego drzewa. Możne, że zadziwali sie na ty hołdy drzewa, kiere idzie uwidzieć w taki wielki zogródce pore metrów dalij. Tak to uż je na tym swiecie, że coby mieć jakisi napad to trzeja nejprzód sie na cosi nadziwać, a potym dziepro chycić sie roboty. Yno nie wiym czymu se dali powieśić na płocie taki wielki chwolidło łód jakigosi Moskały kiery je dlo nich konkuryncyjóm, bo też stawio drzewiane chałupy, ale kansi aż Brynnej. Na płocie wiszóm też chwolidła łod jakigosi “Profitu”, kiery robi rozmajte plechowe i drzewiane parapety na łokna w postrzodku i s pola. Muszym ich jednakowóż pochwolić za tyn napad s tym nadsztiklowanim płota, bo chwolidło mieli za dłógi i nie wlazło im na postawiómy płot. Potrzeba je matkóm wynalazku i tam mogymy na tym płocie widzieć jako ta matka potrzeba zustała zawieszono na tym nadsztiklowaniu.

Mini słownik:

kierysi - ktoś,

postrzodek - środek,

fororz - proboszcz,

ganc - całkiem,

chynóć - rzucić,

krzipać - kaszleć,

ryma - katar,

hajcować - grzać,

kszeft - interes,

chwolidło - reklama,

zadziwali - zapatrzyli,

stawio - buduje,

kansi - gdzieś,

plech - blacha,

s pola - z zewnątrz,

nadsztiklować - nadstawić

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Drzewiane chałupy".