”...ni ma na ni żodnych skryntów”. fot. FJD

Ekologiczne podlywani

Tyn szpatny czas, kiery jakosi ni może łod nas łodyńś, nie wyganio ludzi s chałupy i skyrs tego mało gdo do dzisia wysmyczył ze szopki na pole swoji koło. Kolem Olzy uż porem roków tymu miastowi przirychtowali dlo tusteloków chodnik, po kierym idzie se pojeździć na kole. Na tej tajli na kierej wykidany je asfalt idzie wartko pedajlować, bo kołym nie dyrbie, a przy tym ni ma na ani, żodnych skryntów. Uż gorzij to idzie tam, kaj je yno sóm szuter i je na ni pełno skryntów. Nie ma tego chodnika za moc i chocioż coby kapke s kondycyjóm iś do przodku, to trzeja porem razy te sztreke zarachwać. Eszcze dzisio jak fórt nie do sie przejechać do Czech, to tym tuplym trzeja gzuć s kołym na obkoło porem razy. Trzeja też mieć rychlij wyrachowany czas na to, jak to dzisio nikierzi nazywajóm, czynności fizjologiczne. Bo przedstowcie se, że tam nigdzi nie nóndziecie żodnego haźla i jak sie kómu zachce to musi za potrzebóm wartko gnać ku chałupie. Pół biydy, jak na tym kole w lecie i na chrostach i strómach je pełno liści, to chłopi ze swojim zdzirżym ni majóm żodnej ostudy. Gorzij majóm s tym zdzirżym paniczki, bo każdy przeca wiy, że łóne ni majóm to taki leki jak do chrostów idóm za potrzebóm, to dycki muszóm mieć łoczy aji ze zadku. Rozmajcie to przeca w przirodzie bywo, bo w tych chrostach trefić czasym idzie na jakisi małe zwiyrze, abo insze kumory. Tak rozmyśłom, czy miastowi nasfol nie postawili tam żodnych haźli, coby mieć ganc s darma prowdziwne ekologiczne podlywani. Możne, że dobrze by było przirazić do każdego strómka jakisi papyndekiej, na kierym chłopi robili by sztrajfki, że łóno uż je podlote.

Mini słownik gwary cieszyńskiej:

szpatny czas - brzydka pogoda, łodyńś - odejść, skyrs - z powodu, nie wysmyczył - nie wyciągnął, koło - rower, przirychtowali - przygotowali, tej tajli - tej części, wykidany - wylany, dyrbie - trzepie, kaj - gdzie, kapke - trochę, sztreke zarachować - drogę zaliczyć, fórt - ciągle, tym tuplym - podwójnie, gzuć - gnać, rychlij - szybciej, haziel - toaleta, chrosty - krzaki, strómy - drzewa, zdziyrż - trzymanie, ostuda - kłopot, dycki - zawsze, nasfol - na umyślnie, przirazić - przyczepić, papyndekiel - tektura, sztrajfka - kreska

Tóż miyjcie sie wszedcy dobrze i wiesiołego popióntku.