Tam a haw

Kiejsi tustelocy to mieli ze wszeckim pokój, bo jak roz gdo odewrził jakisi kszeft, to dłógi roki łón fórt fungowoł pod tym samym nomerym i na tej samej ulice. Dzisio to ni ma tydnia, coby cosi nowego w mieście sie nie przitrefiło i możne skyrs tego ludzie gónióm po nim tam a haw. Zeszły tydziyń kierysi mioł taki napad, coby odewrzić nowy banhof przi takim kszefcie, kiery stoji na placu downego Pekaesu. Gdo na to prziszeł tego nie wiym, ale sie mi to bardzo podobo, bo każdy kszefciorz powiniyn sóm wiedzieć kiedy jego kszeft może i powiniyn fungować. Kierysi tam na wyrchu we Warszawie doł powolyni na przedowani wszeckigo, kiedy gdo chce ale yno na banhofach i dłogo nie trzeja było czakać, coby szprytniejsi zaroz przewekslowali swój kszef chocioż na taki maluiśki przistanek. Lepszyj by było, coby zacznył tam na tyn nowy banhof dojyżdżać tyn nasz cieszyński starodowny tramwaj, ale to sie isto nie podarzi, bo ni ma dlo niego sztreki i skyrs tego musiołby mieć gumiane kolca. Uwidzymy co sie bydzie dalij robiło s cieszyńskimi kszeftami, kiere zustały w niedziele pozawiyrane, bo przeca na każdej ulicy nie do sie zrobić nowego banhofu. Ale gdo wiy, bo możne, że naroz kierysi koże autobusóm stować przed Kaflandym, abo inszóm Biedrónkóm i łóni też zacznóm udować, że sóm banhofami, kiere majóm powolyni kszefcić w każdóm niedzielem. Jako sie to skóńczy tego nie wim, ale możne, że uż na prziszły misiónc w Cieszynie, przed każdym kszeftym bydóm stować w niedzielem żółte autobusy i tustelocy s pełnymi szrajtoflami, do nich bydóm wlazować.

Mini słownik gwary cieszyńskiej:

kiejsi - kiedyś, pokój - spokój, odewrził - otworzył, kszeft - sklep, fórt - ciągle, skyrs - z powodu, tam a haw - tam i z powrotem, napad - pomysł, banhof-dworzec, fungować - funkcjonować, przewekslowali - pozamieniali, sztreka - tor, isto - na pewno, nie podarzi - nie uda się, uwidzymy - zobaczymy, pozawiyrane - pozamykane, szrajtofle - portmonetki, wlazować - wchodzić.

Tóż mjyjcie sie wszedcy dobrze i wiesiołego popióntku