”... mo miano 1A, a drugi 1B...”. fot. FJD

Zwekslować ty tablice

Mioł być na sztróm i miały być dwa, a je jedyn i to eszcze na ropem. Jako sie to kómu podarziło, tak to zwekslować tego nie wiym, ale s tych dwóch małych żółtych autobusów zrobił sie jedyn, kiery eszcze poradzi udować że sóm dwa. Bo jak sie kiery podziwo na na tyn rozkład jazdy na kierym pisze że jedyn autobus mo miano 1A, a drugi 1B to na zicher nie prziszeł by na to, że to je fórt tyn sóm. Szofer kiery roz objedzie miasto musi nieskorzij wciś taki knefel, kiery mu za szybóm ukoże takóm literem jakóm w tym czasie mo kómputer we swoji czepóni. Sranda bydzie wtedy, jak szofer przepómni zwekslować ty tablice i pojedzie inszóm trasóm, a bydzie udowoł tego piyrszego. Kiery prziszeł na to, coby po dwóch cestach jechoł tyn sóm autobus i to eszcze s tym samym szoferym tego naprowde nie wiym, ale możne że kiejsi podarzi mi sie na niego trefić. Moc też zajimawe je to, że tyn autobus pojczali rotuzowi tam aże skónsi z Ciechanowa i zustol tu do Cieszyna przismyczóny na lawecie. Skyrs czymu nie przijechoł tu na swojich kołach tego też nie wiym, ale możne że tako laweta kiero mo na siebie autobus mjynij zeżere ropy niż łón sóm. A możne, że rozchodzi sie ło to, że tyn autobus zrobióny je tam kansi aże w Turcyji i tej cesty s tego Ciechanowa by nie wydzierżoł i nie dej boże kolem Warszawy by sie nóm rozkraczył. Eszcze trzeja by sie by było kogosi spytać, kiery mo tak naprowdem tym autobusym jeździć, bo tyn nasz piekny Cieszyn, je taki maluśki, że dlo zdrowio, każdy lufciorz, kiery tu do nas przijedzie, to s chyncióm na swojich klepetach po cyntrumie sóm sie przeca przeszpacyruje.

Mini słownik gwary cieszyńskiej:

sztróm -prąd, podarziło sie - udało się, poradzi - potrafi, sie kiery podziwo - ktoś popatrzy, mo miano - ma nazwę, na zicher - na pewno, fórt - ciągle, nieskorzij - później, knefel - guzik, czepóń - głowa, sranda - heca, prziszeł na to - wpadł na to, cesta - droga, podarzi mi sie - uda mi się, zajimawe - interesujące, pojczali - pożyczyli, przismyczóny - przycągnięty, skyrs - z powodu, kansi - gdzieś, nie wydzierżoł - nie wytrzymał, lufciorz - turysta, klepeta - nogi.

Tóż miyjcie sie wszedcy dobrze i wiesiołego popióntku!