Przidajne do hópkanio

Ni ma tydnia, coby sie cosi nowego nie ciepło tustelokóm w Cieszynie na łoczy. Łostatnio przszła wielko moda na reklamowani tego nowego cieszyńskigo piwa, kierymu kierysi doł na miano “Noszak”. Uż żech roz ło tym pisoł, że je to jakisi dziwoki, bo gdo tam kansi w Polsce se wszymnie jak poczyto to chwolidło, że je to piwo aże z Cieszyna. Nie wiym też kómu, pizło cosi takigo do czepani, coby chrómego Noszaka reklamowoł ganc zdrowy Cieszyniok ? Przeca wszedcy uż w Cieszynie wiedzóm, gdo to był tyn Noszak i żodnych chwolideł wieszać przi cestach uż u nas nie potrzeja. Ale jakby ty chwolidła powieszali po całej Polsce, to przeca ty maluśki litery na kierych idzie poczytać, że to piwo je z Cieszyna, to na zicher trzeja było dać to s przodku. Bo mało kiedy to je tak, że każde chwolidło ludzie czytajóm do kóńca skyrs tego, bo resztem dycki se sami dopowiedzóm. Tak czy inakszyj nie wiym, jako sie to kómu podarziło, że chłopa ze zdrowymi klepetami, kiere sóm mu przidajne do hópkanio po ringu, namówili do pokazowanio swojigo gzychtu na tej reklamie ? Ale nejsrandowniejsze je to, że je tam napisane ło tym, że jak kiery szofer obali pół litra tego piwa to mo sie mieć na baczności, ale nie pisze przed czym ani przed kim. Tak samo majóm sie miarkować paniczki, kiere sóm przi nadzieji, ale gdosi se przepómnioł napisać, że na iste to piwo też dobrze nie zrobi małymu Cieszyniokowi, kiery rychtuje sie do obezdrzynio tego naszego pieknego świata. To niech mi kiery to wyłośli, po co sie reklamuje wiec, kiero szkodzi szoferóm i paniczkóm przi nadzieji?

Mini słownik gwary cieszyńskiej:

tydnia - tygodnia, kierymu kierysi - któremu ktoś, jakisi dziwoki - jakieś dziwne, se wszymnie - na to wpadnie, chwolidło - reklama, pizło cosi - wpadło coś, czepań - głowa, ganc - całkiem, skyrs - z powodu, gdo - kto, c esta - droga, idzie poczytać - można przeczytać, dycki - zawsze, klepeta - nogi, sie podarziło - się udało, do hópkanio - do skakania, gzycht - twarz, nejsrandowniejsze - najśmieszniejsze, przi nadzieji - w ciąży, na iste - na pewno, rychtuje sie - przygotowuje się, do obezdrzynio - do popatrzenia, wiec - rzecz, paniczka - kobieta/pani.

Tóż miyjcie sie wszedcy dobrze i wiesiołego popióntku!