CO TYDZIYŃ PO NASZYMU: S przirodóm nagrować to ni ma dobrebyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio sie zastawiymy na chwiliczkym przi takich poru stromkach, kiere jak urosnóm bydóm plaskate. Kiery prziszeł na to, coby tak młode strómki wrazić do rómek tego nie wiym, ale sie mi zdo, że był to gdosi co ni mo dlo przirody żodnego szacunku. Wyglóndo to tak, jakby wrazić tusteloka do odmaryje i czakać, coby dustoł takóm figurem jakóm mo ta szafa, abo psa wrazić pod szyfóner, coby mu nogi nie urosly. Skyrs czymu tak to kierysi wyszpekulyrowoł, tego nie wiym, ale sie mi zdo, że nie naszli inszych strómków, kiere jak urosnóm, nie roztargałyby dachu, nad tym nowym “banhofym przesiadkowym”. Je to okropeczne dlo tych strómków, kiere ni mogóm rozpostrzić swojich kónorów jako chcóm i muszóm rosnóć wedla kóncepcyji człowieka. Zaimawe też je to, czy ty strómki majóm korzynie w rómkach i bydóm ich puszczać glymboko do ziymi, coby za dwacet roków nie dźwigły tego pieknego trotuaru. Przeca na świecie je tak moc rozmajtych chrostów, kiere majóm jegły i jak by tam zustały posadzóne byłoby zielóno cały rok. Kierysi isto prziszeł na to, że na jesiyń, trzeja bydzie skludzać ty opadnióne żólte listki i nóndzie sie robota dlo tusteloków na świyżym lufcie. Z drugi strony Cieszyna na ulicy Stromej ze zadku ksiónżnicy, kierysi hoduje plaskate gołymbie i bydzie to isto światowo synzacyja. Bo przeca normalnie gołymbie sie klujom w gołymbniku, w kierym se mogóm rozpostrzić skrzidla jako chcóm, a tam miyndzy łoknym a kratóm ni majóm taki możności. Skyrs tego też isto jak ursnóm bydóm plaskate jak ty stromki wedla banhofu. Mini słownik: Tóż miyjcie sie wszedcy dobrze i wiesiołego popióntku
|
reklama
|
Dodaj komentarz