CO TDZIYŃ PO NASZYMU: Zieline idzie posioć byle kaj

”...taki piekne ziele...?

”...do zieleźnej rułki żółtóm tabulke...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Se szluchnóć

Nikiedy jak człowiek nie dźwignie łoczy do góry to idzie aji cosi zaimawego spozdrzić pod klepetami. Na ulicy Biylski na takim kostkatym trotuarze, jakisi macher łod cieszyńskich cestów prziszrubowoł do zieleźnej rułki żółtom tabulke na kierej wyłoślóne je, kaj trzeja jechać. Wiela potrzebowoł na to czasu tego nie wiym, ale isto go mu chybiło, coby spuścić łoczy na dół i podziwać sie co wedla tej rulki rośnie. Możne, że też ta wielko zielina, kiero rośnie wedla tej rułki zustała ekstra tam posioto i nie robi żodnymu ostuty. Piszym zielina, bo możne jak łóna uschnie to kierysi łod tych cestów zaparzi se na ni czaj od bolynio czepani. Na po drugi na zicher uż bydzie wiedzioł, że pasowałoby jóm wytargać, coby nie szpeciła trotuaru. Możne, że też kierysi mo przikozane, coby dziynnie szufke gnojówki na nie wylywać i dziwać sie jak pieknie rośnie. Przeca w tym MZD robi moc tusteloków i łoni też isto by mieli chyńć takigo zdrowotnego czaju aspóń roz do tydnia se szluchnóć. A możne rozchodzi sie ło to, coby rozmajtym lufciorzóm co sie szmatłóm po cieszyńskich cestach ukozać jak sie mo u nas dobrze ekologija, skoro ganc wedla cesty aji na trotuarze poradzi urosnóć taki piekne ziele. Tak se myślym, że dobrze byłoby go jakosi szpecyjalnie opatrować i nasiyni, kiere ś niego spadnie mieć uż na rok do obsiocio eszcze inkszych trotuarów. Dycki przeca to je dobre mieć zdarma taki małe trowniczki, kolem zieleźnych rułek ze znakami cestowymi. Bo przeca każdo nowinka w mieście, poradzi nagnać do nas nowych lufciorzi i skyrs tego możne dobrze by było obsioć tóm zielinóm aji Studnie Trzech Braci.

Mini słownik:
zaimawe-ciekawe,
spozdrzić-zobaczyć,
klepeta- nogi,
cesta-droga,
prziszrubowoł-przykręcił,
wyłoślóne-wytłumaczone,
chybiło-zabrakło,
podziwać-popatrzeć,
wedla- obok,
zielina-zioło,
ostuda-kłopot,
czepań-głowa,
na zicher- na pewno,
szufka-nabierka,
szluchnóć- połknąć,
lufciorz-turysta,
opatrować-opiekować,
dycki-zawsze,
skyrs- z powodu,

Tóż miyjcie sie wszedcy dobrze i wiesiołego popióntku.