CO TYDZIYŃ PO NASZYMU: Lepszyj sie je plyntać pieszki po Cieszynie, bo to sie mo zdarma

”...zustało wyoślóne..."

”...dwie zieleźne rułki...”

Dycki bydym prawił tustelokóm, że ze szpacyrowanio po naszym pieknym mieście wiyncyj sie wywiycie niż s interneta, abo s telewizora. Fórt to je tak, że jak sie cosi uwidzi na swoji łoczy to chocioż małoś nie wiela zustanie tego w czepani. Jo dzisio przed jednym kszeftym spozdrziłech takóm wiec, ło kierej mało isto gdo wiy, bo do tego kszeftu dziynnie sie przeca nie chodzi. Je to to kszeft w kierym idzie kupić rozmajty wercojg, kwiotka i inksze wieca przydajne dóma i aji przi stawianio chałupy. Kierysi na jejich placu postawił dwie zieleźne rułki do kierych prziszrubowane sóm tabulki. Na nich zustało wyłoślóne co łóni bydóm dlo was robić, co byście u nich we spokoju mógli sie pozbyć piniyndzy. Ni mogym prziś na to, co społecznego mo parkowani auta s kupowanim, ale łóni se to isto tak wyszpekulyrowali, coby tóm wygodem przirachować do waszego szmatłanio sie po jejich kszefcie. Napisane tam je, że te ucieche kupowanio i łoglóndanio wszeckich wiecy w jejich kszefcie bydziecie mieć yno zdarma dwie godziny, a jak to przeburzicie to ta uciecha bydzie was kosztować dyche. Jesi sie jednakowóż eszcze delij zadzierżycie to uż bydzie was to kosztowało drugóm dwacatke, a nieskorzij to aji możecie uż nie nónś swojigo auta w tym miejscu w kierym żeście go pochynyli. Na zicher żodyn chłop nigdy sie po kszefcie nie szmatle delij niż porem minut, bo mo to w noturze coby kupić co trzeja i brać sie ku chałupie. Gorzij dycki s kupownim majóm nasze paniczki, kiere każdóm wiec za kieróm majóm zamiar dać porem groszy, poradzóm oglóndać ze dwacet razy i trwo to aji porem godzin.

Mini słownik:
dycki- zawsze,
fórt- ciągle,
czepań-głowa,
kseft-sklep,
spozdrziłech-zobaczyłem,
isto- pewnie,
wercojg-narzędzia,
wieca- rzeczy,
stawać-budować,
wyoślóne-wyklarowane,
wyszpelulyrować-wymyślić,
prziś na to- zrozumieć,
szmatłać się-plątać się,
przeburzić- przeciągnąć,
pochynoć- porzucić,
delij-dłużej

Tóż miyjcie sie wzedcy dobrze i wiesiołego popióntku