CO TYDZIYŃ PO NASZYMU: Fest dzierżeć wolant to je procno wiec

”...siedziała szykowno paniczka...”

Worce sie czasym przynś po naszym mieście, bo dycki podarzi sie na cosi nowego trefić. Łostatnio żech pisoł ło takim chwolidle co wyglóndało jak szmacie do delin i przedstowcie se, że kómósi zrobiło sie luto i naszpanowoł to na hrubszy nowy porwózek. Podarziło sie jóm ganc fajnie wyprościć i dzisio idzie poczytać to wszecko, kaj, co i w kierym tyjaterze bydzie przedstawiane. Nikiedy worce cosi kómusi ukozać i ło tym napisać, coby sie skapowoł, że musi to wartko zrychtować, co kiejsi wymamlasił. Tak sie isto stało też s tym chwolidłym, bo dzisio wisi rowno i wszedcy poradzóm to poczytać, co je na nim napisane. Worce sie też czasym przejechać naszym żółtym miejskim autobusym, coby uwidzieć, że uż aji do naszego miasta prziszła emancypacyja. Mie sie podarziło sztyry tydnie tymu mieć to szczynści i wsiednóć do autobusa w kierym za wolantym siedziała szykowno paniczka, a jo s wybauszónymi łoczami sie dziwoł czy ta rajza s Liburni do miasta skóńczy sie szczynśliwie. Wedla ni stoł inszy szofer, kiery ji pumogoł prziś s wolantym do porzóndku, ale uż kieróm klepete dzierży na pedajli to isto nie widzioł, bo całóm cestem brymza fórt piszczała. Tak to uż je, że każdy s nas dycki cosi musi piyrszy roz w życiu zrobić, a rychlij dobrze je porzykać, coby sie to podarziło. Miesiónc nieskorzij trefiłech zaś na tego samego szofera obleczónego w spodku i muszym rzeknóć, że uż to ganc inakszyj wyglóndało i jakbych nie zozdrził, kiery siedzi za wolantym to bych nie wiedzioł, że je to, ta samo paniczka. I podziwejcie sie chłopi, że nima se co błozna robić s naszych paniczek, bo stykło yno szyry tydnie, a uż nie idzie poznać, kiery w tym autobusie siedzi za wolantym.

Mini słownik:
procnie-mozolnie ,
dycki-zawsze,
podarzi sie- uda się,
deliny-podłoga,
luto-przykro,
ganc-całkiem,
worce-warto,
sie skapowoł-zorientował się,
zrychtować-naprawić,
chwolidło-reklama,
porzykać-pomodlić,
wolant-kierownica,
dziwoł-patrzył,
rajza-podróż,
wedla-obok,
klepeto-noga,
brymza-hamulec,
rychlij-szybciej,
spodek-spódnica,
błozna-żarty,
podziwejcie sie-popatrzcie się

Tóż miyjcie sie wszedcy dobrze i wiesiołego popióntku