CO TYDZIYŃ PO NASZYMU: Isto chybiło farby w marklowickim werku, coby posztrajchować naszóm studnie

”...zar-zowiało je do dzisia”

”...wiater fest dychnył...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Szmata do delin
Dzisio napiszym taki misz masz, a po naszymu wszeckigo po kapce. Styknie sie yno przeszpacyrować po Cieszynie, coby zaroz ciepło sie cosi zaimawego na łoczy. Dejmy na to tako nasza cieszyńsko atrakcyja, kieróm je studnia Trzech Braci, jako była łóńskigo roku zar-zowiało tako je do dzisia. Jako łóńskigo roku rosła wedla ni jakosi zielina niewiadómego pochodzynio tak rośnie do dzisia. Żodnymu s rotuza nie przidzie do czepani, coby tam jakichsi pieknych kwiotków posadzić, a w postrzodku pieknie jóm posztrajchować. Woda, kiero je tam w postrzodku co isto jak mało gdo wiy, je z miastowego waserlajtungu i ni ma prowdziwnóm wodóm ze studni. Styknie yno kolem ,tej studni na chwiliczkem se spocznóć, a zaroz idzie usłyszeć jak woda wedla ni pod takóm zieleźnóm klapóm fórt ciurczy. Kaj łona leci tego nie wiym, ale isto musi tam być jakosi w ziymi dziura do kierej zamias do studni ta woda ucieko. Dóma każdy by uż to downo zakryncił, abo te dziurawóm rułe zrychtowoł, ale tako miastowo wiec, to je dycki niczyjo i żodnymu nie stoji ło to. W pyndziałek zaś wedla naszego tyjateru szło uwidzieć taki wielki chwolidło, kierym tak dyrboł wiater, że co minutem miało inkszóm figurem. Roz leżało to na trowie jak staro szmata do delin, ale jak wiater fest dychnył to nabrało to figure żagla łod jakisi łódki. Kierysi to powiesił na takim rachitycznym porwózku miyndzy dwóma strómami, jak jakisi hamak w kierym spióm marynorze na okryncie. Ale nejsrandowniejsze było to, że szło yno uwidzieć cosi ło tyaterze bez granic/hranic, ale ty litery kaj i kiedy to bydzie, staciły sie kansi miyndzy fołdami.

Mini słownik:
po kapce –po trosze,
zaimawe-interesujące,
ciepnie-rzuci,
łóńskigo-zeszłego,
wedla-obok,
zielina- zielsko,
rotuz-ratusz,
czepań-głowa,
posztrajchować-pomalować,
waserlajtung-przewód wodny,
fórt-ciągle,
kaj-gdzie,
zrychtować-naprawić,
wiec-rzecz,
dyrbać-trzepać,
dycki-zawsze,
chwolidło-reklama,
deliny-podłoga,
stróm- drzewo,
nejsrandowniejsze-najśmieszniejsze,
kansi-gdzieś

Tóż miyjcie sie wszedcy dobrze i wiesiołego popóntku