Szpacyrkym po Cieszynie
“Gdo sie za swój jynzyk wstydzi
takim niech sie każdy brzidzi”
Dopasować lajbik
Za tóm “Marushóm” pod tym samym nomerym 52 na Głymboki, ło kierej łostatnio była rzecz, idzie uwidzieć nejgłówniejszóm lajbikownie w Cieszynie. Jednakowóż kierysi nie wyłoślił tustelokóm, że chybiło im polskigo słowa i siongli po angielszczyzne, kiero pasuje do opowiedzynio czym łóni tam naprowde kszefcóm. Napisali na szyldzie, że je to jakisi brafittingowy salon do kupy s atelier, w kierym każdej paniczce, kiero tam do nich zozdrzi przipasujóm taki lajbik, co nie bydzie sie wrzinoł do ciała. Jako to łóni robióm tego nie wiym, bo żech nima babóm, ale isto bez przimierzanio i bez colsztoka sie nie łobyndzie. Nie wiym też, czy tam w tym alelier kszefcóm chłopi, bo jesi by tak było to na iste stykły by im łoczy, kierymi co drugi chłop poradzi każdej paniczce dopasować lajbik. W muzeum drukarstwa, na kiere idzie trefić zaroz za winklym, do dzisia uwidzieć mogymy maszyny na kierych nasi starzicy drukowali ksiónżki. A robili to ganc tak samo jako przeszło piyńcet roków rychlij wyszpekulyrowoł taki Niymiec Jahannes Gutenberg, kiery prziszeł na to, coby tymi samymi literami drukować wiyncyj ksiónżek. Dobre by było, coby dzisiejsze młodzioki do tego muzeum przichodziły i łoglóndały jako to kiejsi była ciynżko robota wydrukować ksiónżke. Możne, że jakby sie ło tym dowiedzieli, to zaczli by ganc inakszyj spóminać swojich starzików i możne swoji komputry łoblepiliby jejich mianami. W jednóm noc do roka to muzeum puszczo w ruch swoji stare maszyny i pokazuje wszeckim gdo tam przidzie, jako to kiejsi drukowało sie ksiónżki w Cieszynie
Mini słownik: dwiyrze-drzwi, lajbik-biustonosz, chybiło-zabrakło, szyld-tablica, do kupy- razem, zozdrzi-zaglądnie, colsztok-miarka, winkiel-róg, starzicy-dziadkowie, kiejsi-kiedyś, ganc-całkiem, miano-imię, puszczo-uruchamia,
Toż miyjcie sie wszedcy dobrze i wiesiołego popióntku
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz