CO TYDZIYŃ PO NASZYMU: Ty dziwoki miana łod kszeftów tystelokóm uż idóm na nerwy

...idzie trefić na szewca...

Mianuje sie tyn kszeft”Marusha”...

Pinko na pianinie

Dzisio coby lepszyj sie nóm szpacyrowało do wyrchu Głymbokóm, mogymy se szluchnóć porem łyków kawy w zogródku, kiery wystowo na tretuar przi “Mokka Cafe”. Jak nóm sie podarzi w co drugi czwortek miesiónca mieć kapke wolnego czasu i wlyś tam do nich nich na kawe, to usłyszmy panoczka, kiery tam bardzo pieknie pinko na pianinie. Gdo mo rod posłóchać taki pinkani to możne, że niecho u nich pinióndze aji za porem kaw wiyncyj, kiere przi muzyce bydóm mu lepszyj szmakowały. Zaroz wedla nich sóm wielki dwiyrze za kierymi w korytarzu idzie trefić na szewca, kiery sprawi nóm w bótkach krómfleki, abo przibije nowe zole. Pod nomerym pindzisiónt sztyry egzystuje kszeft s babskóm oblyczkóm do kupy s bótkami i taszkami. Za jejich auslagóm idzie uwidzieć napisanóm biołymi literami pytke, kiero namowio nas do wypicio se kawy w kszefcie ło kierym rychlij była rzecz. Tak czy inakszyj w łobu tych kszeftach po polsku napisane je yny to zaproszyni na jejich kawe. Cosi inszego przeca jednakowóż ty oba dwa kszefty majóm, bo nie podarziło im sie na szyldach napisać nic po angielsku jak to wszedcy w Cieszynie majóm, bo isto uznali, że francuszczyzna i italszczyzna je piekniejszo łod rzeczy Szekspira. Wyglóndo na to, że coby nie było im luto to zaroz wedla we dwiyrzach, kierysi odewrził kszeft s takimi samymi wiecami, yno mo inksze miano na szyldzie. Mianuje sie tyn kszeft ”Marusha” i nie wiym ku czymu sie to miano patrzi, bo nie podarziło mi sie tego nikaj pochledać, a taki miano mo yno jedna Niymka, kiero śpiywo techno i ni mo to nic społecznego s kszefcynim babskóm oblyczkóm.

Mini słownik:
szluchnóć-łyknąć,
wlezymy-wejdziemy,
pinko-gra,
wedla-obok,
dwiyrze-drzwi,
krómflek-obcas,
zole-podeszfy,
oblyczka-ubiór,
auslaga-wystawa,
taszka-torba,
rzecz-mowa,
luto-przykro,
kszeft-sklep,
wieca-rzeczy,
podarziło-udało się

Tóż miyjcie sie wszedcy dobrze i wiesiołego popióntku