CO TYDZIYŃ PO NASZYMU: Starzicy i starki to dycki spolegliwi ludzie

Futra i dwiyrze sóm s pieknego drzewa

...gablotka w kierej sóm przirażóne...

Drogi wieca

W tej chałupie na Głymboki, kiero mo nomer szejśdziesiónt dwa i udowo, że je tam mały szpitol, teraz gdosi rychtuje parter, coby tam isto czymsi kszefcić. Przepómnioł jednakowóż ściepać tóm kartkem, kiero wisi za auslagóm i prawi nóm kiedy tam mo odewrzite. Futra i dwiyrze sóm s pieknego drzewa, a szyby w auslagach niepopraskane i wyglóndo na to, że możne tam bydóm przedowane jakisi drogi wieca. Kapke dalij w taki rużowej chałupie pod łoknym wisi gablotka w kierej przirażóne sóm jakisi pstrokate taszki i deczki do kuchynie, a kartka kiero je za szybóm zaproszo nas pińdziesiónt metrów wyżyj. Kaj to je to wyżyj tego nie wiym, ale możne, że w jakimsi balónie, kiery musi furgać w lufcie, bo ta rużowo chałupa przeca nimo wiyncyj niż dziesiyńć metrów zwyżki. Dalij we dwiyrzach w drugi chałupie, kiero kiejsi była zółto, idzie wlyś to rozmajtych insztytucyji i aji też do interesu, kiery kszefci babskóm oblyczkóm.Puc na ścianach ta chałupa mo uż tak zmazany i spynkany, że naprowde wielkóm gańbóm je dzierżeć w nim taki szacowne insztytucyje jak zasłóżónóm naszóm“Solidarność” i “Związek Kombatantów”. Isto chybiło kómósi piniyndzy na nowóm farbe, abo może miastowe urzyndniki chcóm, coby ta chałupa sama s sie była wielkim kómbatantym i aji możne nowym muzeum. Ci posunióni w rokach kómbatantowi starzicy urzyndujóm tam dwa razy do tydnia, a młodziocy s Solidarności na szyldzie majóm yno napisany nomer telefónu i rachujóm se, że możne roz za kiedy kierysi do nich zazwóni.

Mini słownik:
gdosi-ktoś,
kszefcić-handlować,
ściepać-zrzucić,
auslaga-wystawa,
odewrzite-otwarte,
futra-ościeżnice,
wieca-rzeczy,
przirażóne-przytwierdzone,
deczka-makatka,
zwyżka- wysokość,
oblyczka- odzież,
puc-tynk,
chybiło-zabrakło,
starzik-dziadek

Tóż miyjcie sie wszedcy dobrze i wiesiołego popióntku