CO TYDZIYŃ PO NASZYMU: Przidzie kiejsi taki czas, że za ugryziyni nie miarowego jabka bydzie sztrafbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio przyndymy sie po Starym Targu, coby obezdrzić co sie tam pomiyniało w łostatnich rokach. Isto nic takigo, coby szło roz dwa uwidzieć, bo jak budy s zielyninóm kiejsi tam stoły tak stojóm tam do dzisia. Yno moc aut przibyło i widać ich tam wszyndzi, że nie idzie razinko dostać sie ani na Głymbokóm i ani na ulicóm Fredry,kiero kludzi ku teatru. Widać też, że kszefciorze łod tej zielyniny prziszli ku pinióndzóm, bo szmaciane dachy na jejich budach sóm jakisi piekniejsze. U nich ni ma tam nic łacniejsze, bo przeca to co łoni tam przedujóm kupióne zustało kansi we świecie. Kiejsi na takim torgu tustelocy przedowali to, co sami uchowali dóma i co posadzili we swoji zogródce. Człowiek wiedzioł, że je to zdrowe i tymu, bez okocónianio sie, aji jak to było kapke droksze wartko to kupił. Nie wiym jako to dzisio robióm ty wszecki rolniki, że jabka, gruszki i śliwki sóm taki jak s pod tej samej sztancy.Możne, że zaczyno sie to łod zorka kiere przesiywajóm przez szpecyjalne cedzitko, coby były wszecki jednaki. Jak jednaki zorko, abo flancek wrazi sie do ziymi to isto s tego urośnie jednako marekwia, pietruszka, kwak i aji inksze zielyniny. Możne, że na to je inkszo metoda, ale jo ło taki nie słyszoł, chocioż roz jedyn chłop mi prawił, że dejmy na to taki jabka przeciskuje sie przez szpecyjalnóm wystrziganóm dziurem w papindeklu. Kiere przelecóm durch idóm do dymióna na wino, a ty wiynksze s jednakóm miaróm idzie po tym uwidzieć na ladzie w rozmajtych Lidlach i Kauflandach. Je to moc zaimawe czymu dzisio tak to sie robi, bo przeca tak samo jako kiejsi naszymu bachorzu było jedno, jak wielki zjymy to jabko czy jakómsi marekwie. Mini słownik: Tóż miyjcie sie wszedcy dobrze i wiesiołego popióntku.
|
reklama
|
Dodaj komentarz