CO TYDZIYŃ PO NASZYMU: Prowdziwe kwiotka chocioż drogi to aspóń pieknie wóniajóm

”...posadzili wedla chałupy rozmajte strómki...”. fot. FJD

”...dłógi roki żodnymu ty kurniki nie zawadzały...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Jechała ku Cieszynu

Tyn tydziyń zacznymy szpacyr ku Marklowicóm po ulicy Frysztacki. Uż kiejsi doszlimy do tego małego cestowego kolca, ale poszlimy do góry ku granicy, coby obezdrzić te nowóm ulicem Langera, a szpecjalnie tyn chodnik wedla ni. Dzisio prziszła mi do czepani tako wspóminka, kiero mie napadła jak żech sie podziwoł na chałupke łod rodziny Solowskich. Eszcze kiejsi za socjalizmu dziynnie pani Solowska jechała s wózeczkym ze swojimi kwiotkami ku Cieszynu na Kurzi Targ, coby kapke grosza utarżyć. Były to prowdziwe kwiotka wyrośnióne w normalnej ziymi podlotej gnojówkóm, a ku tymu były łóne nasze i tu stela. Teraz je pełno kwiotków w każdym kszefcie,kiere niczym nie wóniajóm, bo prowdziwego słóńca nigdy nie widziały. Dzisio uż tej zogródki kaj rosły ty kwiotki nima, bo młodziocy kierzi prziszli tam miyszkać posadzili wedla chałupy rozmajte strómki, chrosty i inkszóm zielynine, coby dobrze zapostrzić chałupe przed autowym smrodym. Jak pokroczymy kapke dalij to nie idzie nie uwidzieć tego hroznego wiaduktu, a pod nim pochyniónych kurników łod pana Kwiczali. Dłógi roki żodnymu ty kurniki nie zawadzały i dowały robotem poru ludzióm, ale dzisio wszecko musi być wielki i taki maluśki kurnik eszcze s downej epoki żodnymu nie pasuje dzierżeć. Kiejsi eszcze co starsi isto też pamjyntajóm był tam ze zadku warsztat w kierym rychtowali piece do cyntralnego. Dobrze, że tyn wiadukt postawili, bo dzisio by uż wiela s Cieszyna nie zustało skyrs tych wielgucnych tirów. Lepszyj by też było, coby łón był szyrszy, bo aut przibyło a ku tymu pasowołby do tego dwupasu S1.

Mini słownik:

kiejsi-kiedyś,

cestowe kolco - rondo,

wedla - obok,

czepań - głowa,

utarżyćzogródek - ogródek,

strómki - drzewa,

chrosty - krzaki,

wóniajóm - pachną

zapostrzić - zasłonić,

hrozny - wielki,

ze zadku - z tyłu,

skyrs - z powodu.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Sie spadki zwyrtnóć".