CO TYDZIYŃ PO NASZYMU: Kartacz to je przidajny wercojg do pucowanio

"...kszefci rozmajtymi kamiyniami...". fot. FJD

"...na kierej gdosi napisoł""-"zakaz wieszania reklam". fot. FJD

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Dzisio uż isto dóndymy do kóńca tej Hażlaski i trzeja bydzie napisać co tam eszcze je, a nima uż tego moc wiela. Małoś niewiela tam na płotach wisi chwolideł, bo ludzie te ceste ni majóm po chodniku. Kapke autów tam jeździ, ale szoferzi jak jadóm to muszóm dować pozór na dziury w ceście i kolem sie rozglóndać. Na jednym płocie zoczyłech takóm tabuke na kierej gdosi napisoł - "zakaz wieszania reklam". Je to moc srandowne, bo na prywatnym płocie żodyn nic przeca nie wieszo jak sie właściciela nie spyto. Po lewo gdosi w taki małej chałupce kszefci rozmajtymi kamiyniami, kiere przidajne sóm na rozmajte przileżytości, ale na zicher potrzebujóm to wszedcy przibyźni jak im gdosi umrze. Kamiyń a eszcze taki wyglancowany dłógo sie świyci i ludziska ni majóm ś nim łostudy. Styknie yno roz na rok przed piyrszym listopada kapke s giskany na tyn kamiyń cyrpnóń wody i przejachać po nim kartaczym. Je to wygoda dlo tych co nimajom czasu ,a ku tymu i tak na tych kamiynnych nagrobkach w to świynto je pełno zielónych winców i tego kamiynia wubec nie widać. S tego co na tym jego szyldzie idzie poczytać to ty rozmajte kamiynie idzie se też obsztelować na inksze przileżytości. Kapke dalij idzie uwidzieć eszcze jakisi wolny grónt do wystawiynio chałupy i ci co majóm kapke grosza przi duszy muszóm sie pośpiychać, coby ich kiery nie przedbiygnył. Zaś po prawo je zawrzity zogródek w kierym kiejsi kszefcili autowym gazym. Gdosi yno zapómnioł ściepać ty dwie tabulki, kiere fórt zaproszajóm nas do wjechano na jejich plac i nabranio se gazu, kierego uż tam downo ni ma.

Mini słownik: