CO TYDZIYŃ PO NASZYMU: Nie każdy poradzi drugimu dać takóm facke, coby tyn kopyrtnył

Doś dłógo trzeja było czakać, coby w Cieszynie podarził sie nóm zaś taki szprytny chłop, kiery poradzi dać kómusi takóm facke, że tyn zaroz chlaśnie sobóm ło ziym. Eszcze przed wojnóm jak to moja stareczka prawiła za starej Polski, też my mieli w Cieszynie takigo chłopa, kiery proł wszeckich po pysku i był aże sześć razy nejlepszy w całej Polsce. Mianowoł sie Bolko Kantor i proł wszeckich yno ryncami w rynkawicach bo był bokserym. Czas poszeł do przodku i dzisio tyn nasz cieszyński szportowiec, kiery mianuje sie Jan Błachowicz robi to ganc inakszyj. Na ringu piere rynkami inszych chłopów, a jak sie mu podarzi to aji świtnie nogami. Nie wiym gdo wyszpekulyrowoł taki dziwoki szport, ale tyn nasz tystelok tak to dobrze pochytoł, że we swoji wodze zeproł wszeckich i zustoł mistrzym świata. Muszymy se to wożyć i chłopa popytać, coby tego walynio po pyskach też inszych cieszynioków nauczył, tak jak to kiejsi po wojnie robił Bolko Kantor. Na iste ni ma to taki leki jak boksowani, bo trzeja prziś na to, kiedy tego drugigo trzeja prać po pysku, a kiedy świtnóć nogami. Ni ma to taki leki, coby sie w tym rozeznać, bo dzisio je tela tego rozmajtego szportu, że moło gdo wiy ło co sie w nim rozchodzi. Hańdownij prali sie po pyskach yno ci, co mieli na to chyńć, a dzisio eszcze sie muszóm rychlij dać zwożyć, coby jedyn drugigo nie ukrziwdził. I wszecko sie to biere s tej notury, kiero jednymu dała zwyżke, a drugimu woge. Nejlepszyj majóm dycki ci, co majóm dwa metry zwyżki i wożóm sto kilo, bo mało gdo mo taki dłógi rynce, coby go dosióngnóć. I możne też tymu, kierysi prziszeł na to, coby ci mjynsi mógli se aji w ringu nogami świtnóć.

Mini słownik:

sie nóm podarził - nam się udał, facka - uderzenie, chlaśnie - uderzy, stareczka - babcia, prawiła - mówiła, proł - uderzał, isto - prawdopodobnie, do przodku - do przodu, mianuje - nazywa się, ganc - całkiem, inakszyj - inaczej, piere - uderza, zeproł - pobił, wożyć - szanować, świtnie - kopnie, wyszpekulyrowoł - wymyślił, dziwoki - śmieszny, pochytoł - połapał, walynio - uderzania, na iste - na pewno, hańdownij - bardzo dawno, rychlij - szybciej, zwyżka - wzrost, woga - ciężar, dycki - zawsze, prziszeł na to - wpadł na to

Tóż miyjcie sie wszedcy dobrze i wiesiołego popióntku.